პრემიერმინისტრის, ირაკლი ღარიბაშვილის მტკიცებით, შიდა ინფორმაცია აქვს, რომ 3 ოქტომბერს დაანონსებულ აქციაზე იგეგმებოდა რამდენიმე ოპოზიციონერი ლიდერის მკვლელობა, რათა ხელისუფლებას ლეგიტიმაცია დაეკარგა.

"აქცია დააანონსეს 3 ოქტომბერს, ანუ დღეს უკვე უნდა გამართულიყო აქცია რუსთაველზე და საღამოს, კულმინაციის დროს სააკაშვილი გამოჩნდებოდა როგორც მხსნელი და იქ, რა თქმა უნდა, მოხდებოდა შოკი. [...] კულმინაციის დროს მაქსიმუმ 10 000 ადამიანის მობილიზებას შეძლებდნენ და პოლიციას, ბუნებრივია, მაშინ მოუწევდა მისი დაკავება, მათ შორის, სპეც. საშუალებების გამოყენებაც ალბათ მოგვიწევდა.

ამ დროს ერთ-ერთ ვერსიად განიხილავდნენ რამდენიმე ოპოზიციური ლიდერის მკვლელობას, პირდაპირ გიცხადებთ შიდა ინფორმაცია არის, მათი, ასე ვთქვათ, ერთ-ერთი ვერსია, ასე განიხილებოდა, რომ მომხდარიყო ჩვენი ხელისუფლების დელეგიტიმაცია" — აცხადებს ღარიბაშვილი იმედის ეთერში.

მისივე თქმით, სწორედ მაშინ მოითხოვდნენ მთავრობის გადადგომასა და ახალი არჩევნების დანიშვნას.

"სრულად დავკარგავდით ამ შემთხვევაში ლეგიტიმურობას, უცხოეთში აჩვენებდნენ, რომ აი, ნახეთ რა ხდება, ხოცავენ პირდაპირ ოპოზიციის ლიდერებს და რეალურად მაშინ მოითხოვდნენ არათუ სააკაშვილის დაკავებას, არამედ მთავრობის გადადგომას, ეს ერთი და მეორე, ახალი არჩევნების დანიშვნას", — ამბობს ღარიბაშვილი.

27 სექტემბერს ექსპრეზიდენტმა სააკაშვილმა ფეისბუქზე გამოაქვეყნა ბილეთების ფოტო, რომლის მიხედვითაც ქვეყანაში 2 ოქტომბერს, ხმის მიცემის პროცედურის დასრულების შემდეგ უნდა დაბრუნებულიყო. მმართველ გუნდში ამბობდნენ, რომ ის სიტყვას ისევ უღალატებდა და ჩამოსვლას ვერ გაბედავდა, მაგრამ თუ მაინც გაბედავდა, აეროპორტშივე დააკავებდნენ. თუმცა, არჩევნების წინა დღეს, პირველ ოქტომბერს, სააკაშვილმა დაპოსტა, რომ საქართველოში იმყოფებოდა. რამდენიმე საათში მან ორი ვიდეოც გაავრცელა, რომელშიც ამბობდა, რომ ბათუმშია და აქტიურად აპირებს ბრძოლას.

სანამ სააკაშვილი მხარდამჭერებს მობილიზაციისკენ მოუწოდებდა, ქართულ ოცნებაში ამტკიცებდნენ, რომ ის არათუ ქვეყანაში შემოვიდა, უკრაინაში იყო. იმავეს ამბობდა შინაგან საქმეთა სამინისტროც და ამტკიცებდა, რომ მას არც უკრაინის და არც საქართველოს საზღვრები არ გადაუკვეთავს. ამ განცხადებებიდან რამდენიმე საათში პრემიერმინისტრმა, ირაკლი ღარიბაშვილმა შინაგან საქმეთა მინისტრთან და სახელმწიფო უსაფრთხოების სამსახურის ხელმძღვანელთან ერთად ბრიფინგი გამართა, სადაც თქვა, რომ სააკაშვილი დაკავებულია და პენიტენციურ დაწესებულებაში გადაიყვანეს. მოგვიანებით, იმედის ეთერში პრემიერმინისტრი ამტკიცებდა, რომ ყველაფერი წინასწარ იცოდნენ და "ოპერატიული ტაქტიკის" გამო უწევდათ საპირისპირო განცხადებების გაკეთება.

გაიგე მეტი: