დროა ლიდერის, ელენე ხოშტარიას განცხადებით, "ხმების დასაცავად" უბნებზე იშლებიან. ამის შესახებ მან ეგზიტპოლების შედეგების გამოცხადების შემდეგ თქვა.

"დედქალაქის მოგება არის ქართული ოცნების დამარცხება. მივდივართ უბნებზე, რომ დავიცვათ ხმები", — აცხადებს პარტია დროას ლიდერი.

მისი თქმით, საჭიროა ხმების დაცვა და მალე თბილისს ეყოლება კოალიციური მმართველობა.

"ძალიან მნიშვნელოვანია, რომ დედაქალაქმა, რაც ვიცით, თქვა თავისი სიტყვა, ხალხი გამოვიდა და ქართული ოცნება დაამარცხა. რა თქმა უნდა, ჩვენი ამოცანაა დავიცვათ ხმები უახლოესი 2 საათის განმავლობაში. წარმომიდგენია აღელვებული ქართული ოცნების ლიდერები. ამიტომ ვიშლებით უბნებზე დაყველა ჩვენს მომხრეს მოვუწოდებთ ბოლომდე დავიცვათ ხმები და მალე თბილისს ეყოლება კოალიციური მმართველობა", — აცხადებს ხოშტარია.

ის IPSOS-ისა და Edison Research-ის კვლევებს ენდობა.

"არ არსებობს ქართული ოცნების კვლევა, ასე ცოტას რომ იწერენ, ალბათ იმაზე მინუს 10% არის, მსჯელობასაც არ ვაპირებ მათ კვლევებზე. ერთადერთი სანდო არის IPSOS, იგივე ინფორმაცია მოიდიოდა უბნებიდან მთელი დღის განმავლობაში, ჩვენ ვნახეთ მობილიზებული თბილისი. ამან მოიტანა შედეგი. ახლა რეგიონებში და თბილისში უნდა დავიცვათ ხმები და ისიც გასათვალისწინინებელია, რომ ხალხს ეშინია ხოლმე კვლევაზე პასუხის გაცემა. Edison Research და IPSOS ორი ობიექტური კლევაა. სურათი ნათელია, თბილისი მოგებულია", — აცხადებს ხოშტარია.

დღეს, 20:00 საათის შემდეგ სამი სხვადასხვა ეგზიტპოლის შედეგები გამოქვეყნდა, რომლებიც ერთმანეთისგან განსხვავებულ მონაცემებს აჩვენებს. კერძოდ, Edison Research და IPSOS ამბობს, რომ თბილისში მეორე ტური იქნება, ხოლო GORBI-ის ეგზიტპოლის მიხედვით კახა კალაძეს 51,3%-იანი მხარდაჭერა აქვს. რაც შეეხება პარტიულ რეიტინგებს, Edison Research-ის მიხედვით, ქართული ოცნება 43%-იან ბარიერს ლახავს და 46% აქვს, ხოლო IPSOS-ის (მხოლოდ თბილისი) თანახმად, მმართველ გუნდის შედეგი 38%-ია, GORBI კი ამბობს, რომ ქართულ ოცნებას 47,6%-იანი მხარდაჭერა აქვს.