შინაგან საქმეთა სამინისტრო მარნეულში ლეიბორისტული პარტიის წევრის დაჭრას ადასტურებს, თუმცა ამბობს, რომ ბრალდებული დაკავებული არ არის.

"სიტყვიერი შელაპარაკება ფიზიკურ დაპირისპირებაში გადაიზარდა, რა დროსაც არაფხიზელ მდგომარეობაში მყოფმა გ.რ.-მ დანის გამოყენებით ე.მ.-ს მიაყენა დაზიანება მუცლის არეში. ფიზიკური დაპირისპირების დროს დაზიანებები მიიღო თავად გ.რ.-მაც. პოლიციის მიერ ამ ეტაპზე ჩატარებული ოპერატიულ-სამძებრო ღონისძიებების შედეგად იდენტიფიცირებულია დაპირისპირებაში მონაწილე ყველა პირი, ჩატარებულია მოწმეთა გამოკითხვები. ტარდება ყველა საჭირო საპროცესო და საგამოძიებო ღონისძიება, რის შემდეგაც მოხდება აღნიშნული ქმედების ჩამდენი პირის ბრალდებულის სახით დაკავება", — აცხადებენ შსს-ში.

მათივე ინფორმაციით, გამოძიება სისხლის სამართლის კოდექსის 117-ე მუხლით დაიწყო, რაც ჯანმრთელობის განზრახ მძიმე დაზიანებას გულისხმობს.

ლეიბორისტული პარტიის ცნობით, მარნეულში ქართული ოცნების კოორდინატორმა მათი დამკვირვებელი დაჭრა. შემთხვევა მარნეულის სოფელ დაშთაფაში მოხდა. პარტიის წევრი, მამუკა ჯუღელი On.ge-სთან ამბობს, რომ ამ დროისთვის დაშავებული საავადმოყოფოშია გადაყვანილი და მისი მდგომარეობა სტაბილურად მძიმეა.