თბილისის მერობის კიდევ ერთმა კანდიდატმა — რიჩარდ არინზე ოგბუნუჯუმაც დააფიქსირა თავისი არჩევანი 2021 წლის ადგილობრივი თვითმართველობის არჩევნებზე და მოსახლეობასაც აქტიურობისკენ მოუწოდა.

"მე დარწმუნებული ვარ, დღეს მოსახლეობა გააკეთებს სწორ და გულწრფელ არჩევანს. მე მინდა მოვუწოდო ყველა ქართველს, მივიდეს საარჩევნო უბანზე და მისცეს [ხმა] თავის სწორ, გულწრფელ არჩევანს", — განაცხადა ოგბუნუჯუმ.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.