საქართველოს პრეზიდენტის, სალომე ზურაბიშვილის განცხადებით, არჩევნებზე ხმა დეპოლარიზაციას მისცა. მან თვითმართველობის არჩევნების მნიშვნელობაზე ისაუბრა და ხაზი გაუსვა, რომ ამ არჩევნებზე პოლარიზაცია უნდა დასრულდეს.

"ადგილობრივი არჩევნები არის ყველაზე მნიშვნელოვანი დემოკრატიულ პროცესებში, იმიტომ, რომ ეს არის ის არჩევნები, სადაც მოქალაქეებს მართლა შეუძლიათ რომ აირჩიონ თავთავიანთ ადგილზე დაბაში, სოფელში, ქალაქში ისინი, ვინც ხვალ ადგილობრივ საკითხებს გადაუწყვეტენ. ამავე დროს, ეს არის ის ადგილი, სადაც, ალბათ, ყველაზე ნაკლებად უნდა იყოს პოლარიზაცია და ეს არის ის არჩევნები, როცა უნდა დასრულდეს პოლარიზაცია, ამისი იმედი მაქვს და მე ამას მივეცი ხმა, დეპოლარიზაციას", — განაცხადა მან.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.