აშშ-ის ელჩი საქართველოში, კელი დეგნანი აცხადებს, რომ სამართლიან არჩევნებში არ არის ადგილი ხმის მოსყიდვისთვის, ამომრჩევლის დაშინებისთვის და ადამიანების იძულებისთვის გადაუღონ ფოტო მათ ბიულეტენებს. ამის შესახებ მან მარნეულში განაცხადა, სადაც საარჩევნო პროცესებზე დასაკვირვებლად ორ უბანს ეწვია.

"ძალიან მოხარული ვარ, რომ არჩევნებს აქ, მარნეულში ვაკვირდები. სასიამოვნოა იმის დანახვა, რომ ხალხი მიდის არჩევნებზე და პირბადეს ატარებს. ეს არჩევნები საქართველოსთვის ძალიან მნიშვნელოვანია, მთავარია, დაცული იყოს მშვიდი გარემო და თავისუფალი არჩევანი ხალხისთვის. თავისუფალი და სამართლიანი არჩევნების გზით საკუთარი ლიდერების არჩევის თავისუფლება ნებისმიერი ჯანსაღი დემოკრატიის ფუნდამენტია. სამართლიან არჩევნებში არ არის ადგილი ხმის მოსყიდვისთვის, ამომრჩევლის დაშინებისთვის და ადამიანების იძულებისთვის გადაუღონ ფოტო მათ ბიულეტენებს", — განაცხადა კელი დეგნანმა

მისი თქმით, ამერიკის შეერთებული შტატების საელჩოს 75 ადამიანი ჰყავს მივლენილი საქართველოს სხვადასხვა რეგიონში, რათა დააკვირდნენ არჩევნებს, თვალყური ადევნონ მედიას, გაესაუბრონ ადგილობრივ და საერთაშორისო დამკვირვებლებს.

"ეს მნიშვნელოვანი დღეა და ჩვენ, მართლაც, ძალიან გვინდა, რომ ის იყოს დღე ქართველებისთვის, რომლითაც ისინი იამაყებენ. აქამდე რასაც დავაკვირდი, საკმაოდ მშვიდი და წყნარი გარემოა და იმედი მაქვს, ასე გაგრძელდება მთელი დღის განმავლობაში. იმედია შედეგების მიმართ იქნება პატივისცემა. ცენტრალურმა საარჩევნო კომისიამ ბევრი იმუშავა არჩევნების მოსამზადებლად, რათა კოვიდის მიუხედავად, ხალხისთვის ხმის მიცემა უსაფრთხო ყოფილიყო. ასე რომ, თუ შეიძლება, წადით არჩევნებზე. მადლობა", — თქვა ელჩმა.