"კახა კალაძემ ძალიან ბევრი რამე იცის, ასე რომ, დამშვიდდით", — ასე პასუხობს თბილისის მერობის კანდიდატი კახა კალაძე ჟურნალისტების კითხვას, იცოდა თუ არა საქართველოს ექსპრეზიდენტის, მიხეილ სააკაშვილი ქვეყანაში შემოსვლის შესახებ. ხმის მიცემის შემდეგ კალაძემ თქვა ისიც, რომ სააკაშვილი არის დამნაშავე და შესაბამისად მოუწევს პასუხისგება იმ დანაშაულებზე, რაც ჩაიდინა".

ქართული ოცნების გენერალურმა მდივანმა, რომელიც 2021 წლის ადგილობრივი თვითმართველობის არჩევნებში დედაქალაქის მერობის კანდიდატად იყრის კენჭს, თავის არჩევანზე ღიად ისაუბრა:

"ხმა მივეცი სიმშვიდეს, სტაბილურობას, მშვიდობას, ქალაქის განვითარებას, აღმშენებლობას, იმას, რომ მეტი სიცოცხლე შევიტანოთ ყველა უბანში, შესაბამისად, ამ ყველაფრის გაკეთება ერთადერთ პარტიას შეუძლია — ეს გახლავთ ქართული ოცნება დემოკრატიულ საქართველო. შესაბამისად, ხმა მივეცი ქართულ ოცნებას იმისთვის, რომ ქვეყანაში იყოს მშვიდობა, სიმშვიდე და სტაბილურობა", — განაცხადა კალაძემ.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.