ევროკავშირის ელჩი საქართველოში, კარლ ჰარცელი თბილისში #14 საარჩევნო უბანს ეწვია და ჟურნალისტებთან საარჩევნო პროცესზე ისაუბრა.

მისი თქმით, როგორც საქართველოს მეგობარსა და მხარდამჭერს, იმედი აქვს, დემოკრატიის მონაპოვარით ისარგებლებს ყველა მოქალაქე.

"ეს არჩევნები მნიშვნელოვანია. მნიშვნელოვანი იქნება იგი საქართველოს მომავლისთვის. ესაა ტესტი დემოკრატიისთვის, რომელიც დამარწმუნებლად უნდა იქნას ჩაბარებული. ხვალ საერთაშორისო დამკვირვებლებისგან, მათ შორის აქ მყოფი ODIHR-ისა და ევროპელი პარლამენტარებისგან გამოქვეყნდება მათი აზრი და ვერდიქტი", — განაცხადა ჰარცელმა.

მისი თქმით, დღეს პოლიტიკოსებმა საკუთარი მოსაზრებები არ უნდა გამოთქვან და ამომრჩევლებმა უნდა გაჟღერონ საკუთარი ნება.

"არჩევნები არის ძალიან მნიშვნელოვანი დღე ყველა დემოკრატიისთვის. ესაა დღე, როცა, პოლიტიკოსები, პოლიტიკის კომენტატორები და ისინი, ვინც ქმნიან საზოგადოებრივ აზრს, იყვნენ ჩუმად და ამომრჩევლებმა საკუთარი ნება გააჟღერონ საარჩევნო ყუთებთან", — თქვა კარლ ჰარცელმა.

მისი თქმით, ქვეყანაში პოლიტიკური ვითარება პოლარიზებულია, რაც სამწუხაროა, თუმცა ყველა პოლიტიკური მხარე თანხმდება არჩევნებზე ხმის მიცემის მნიშვნელობაზე.

"ბოლო რამდენიმე კვირის და ბოლო 24 საათის განმავლობაში საქართველოს პოლიტიკურ ცხოვრებაში, სამწუხაროდ, ვიხილეთ პოლარიზაციის დონე. თუმცა ყველა პოლიტიკური მხარე თანხმდება, რომ მნიშვნელოვანია, ყველა მივიდეს არჩევნებზე და საკუთარი ნება გამოხატოს. ვიმედოვნებ და მჯერა, რომ ყველა ადამიანი შეძლებს მშვიდ, მშვიდობიან, უსაფრთხო გარემოში ხმის მიცემას და ასეთივე უსაფრთხო და დაცულ გარემოში გექნებათ ჟურნალისტებს მუშაობის საშუალება", — აღნიშნა ელჩმა.

კარლ ჰარცელმა ამომრჩევლებს პანდემიის პირობებში უსაფრთხოების ზომების დაცვის საჭიროებაც შეახსენა.

"მინდა აღვნიშნო, ახლა პანდემიის პერიოდია და ყველას შევახსენო, მიიღოს საჭირო დაცვის ზომები როგორც საარჩევნო უბნებზე, ისე გარეთ და დარწმუნდნენ, რომ ყველას ჯანმრთელობა და კეთილდღეობა დაცულია. ასევე მინდა ვთხოვო მათ, ვინც ხმას აძლევს, მაქსიმალურად დაიცვან საკუთარი თავი, მიიღონ საჭირო ზომები, შეინარჩუნონ სოციალური დისტანცია", — ამბობს ჰარცელი.


დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.