დღეს, 25 მაისს, თბილისის სააპელაციო სასამართლომ ძალაში დატოვა საქალაქო სასამართლოს გადაწყვეტილება და საბი ბერიანიძის მკვლელობაში ბრალდებული ლ. კ. უდანაშაულოდ ცნო. მოკლულის ოჯახის ადვოკატის, ქალთა ინიციატივების მხარდამჭერი ჯგუფის წარმომადგენლის, ციალა რატიანის თქმით, სასამართლომ გადაწყვიტა, რომ ლ.კ. აუცილებელი მოგერიების ფარგლებში იმყოფებოდა:

"თბილისის საქალაქო სასამართლოს გადაწყვეტილება ისევ ძალაში დარჩა და ფაქტობრივად, ადამიანმა რომელმაც საბი ბერიანი მოკლა, სასამართლომ ჩათვალა რომ აუცილებელი მოგერიების ფარგლებში იმყოფებოდა".

მისივე თქმით, ძალაში დარჩა ბიანკა შიგუროვას ცემის მუხლი და სხვისი ქონების დაზიანება, ანუ ცეცხლის წაკიდება. აღნიშნული მუხლებით ლ.კ. ოთხწლიან პატიმრობაში რჩება.

2014 წლის 11 ნოემბერს ტრანსგენდერი საბი ბერიანი საკუთარ ბინაში მოკლეს. შსს-ს ინფორმაციით, მკვლელობა ლ.კ.-სა და ბერიანს შორის შელაპარაკების დროს მოხდა.