პარლამენტის თავმჯდომარე, კახა კუჭავა სპეკულაციას უწოდებს მოსაზრებებს იმის შესახებ, რომ მედიაზე ზეწოლაა. ასე გამოეხმაურა ის ტელეკომპანია ფორმულას ირგვლივ განვითარებულ მოვლენებს. მან, ასევე, დადებითად შეაფასა თავდაცვის სამინისტროს განცხადება, რომელმაც ფაქტობრივად, გამორიცხა, ფორმულას დაყადაღების ალბათობა.

"ძალიან კარგია, რომ განცხადება გააკეთა თავდაცვის სამინისტრომ მალევე და ამით დახურა, ფაქტიურად, სივრცე, რომ სპეკულაციები აღარ გაგრძელებულიყო, თითქოს რამე კავშირი აქვს ამას თავისუფალ მედიასთან [...] შავი ფული სადაც არ უნდა ტრიალებდეს, ტელევიზია იქნება თუ სხვა, გამოსაძიებელია — ეს ხომ ფაქტი არის", — განაცხადა კუჭავამ პალიტრანიუსის ეთერში.

ჟურნალისტის კითხვის საპასუხოდ, რატომ შეიტანა თავდაცვის სამინისტრომ ფორმულას დამფუძნებლის, დავით კეზერაშვილის წინააღმდეგ სასამართლოში სარჩელი წინასაარჩევნოდ, კუჭავამ განაცხადა, რომ ეს თავად სამინისტროს უნდა ვკითხოთ.

"თავდაცვის სამინისტროს უნდა კითხოთ, რაღაც პროცედურები რატომ დაიწყეს ახლა, მაგრამ, ეს არ არის ახალი დაწყებული, ხომ? მესამე ინსტანცია, პირველ რიგში, მიუთითებს, რომ იყო მანამდე მეორე ინსტანცია, მანამდე პირველი ინსტანცია. ეს საკითხი დიდი ხანია მუსირებს და საკითხია, რომელზეც მიდის მსჯელობა, მათ შორის, სასამართლოში [...] მესმის, შეიძლება ვიღაცისთვის კარგად ჟღერდეს ეს წინასაარჩევნოდ, რომ აი, მედიას ახშობენ და ხელს უშლიან მუშაობაში, თუმცა ფაქტია, რომ ეს აბსოლუტურად კავშირში არ იყო ამასთან და შესაბამისად, იყო სპეკულაცია", — განაცხადა პარლამენტის თავმჯდომარემ.

გუშინ, 30 სექტემბერს, თავდაცვის სამინისტრომ ყოფილი მინისტრისა და ტელეკომპანია ფორმულას დამფუძნებლის, დავით კეზერაშვილის მიმართ სასამართლოში სარჩელი შეიტანა. სამინისტროს განცხადებით, ისინი თავდაცვის უწყების მიმართ "დანაშაულებრივი ქმედებით მიყენებული ზიანის" ანაზღაურებას ითხოვენ.

ტელეკომპანია ფორმულაში თემაზე საგანგებო ბრიფინგი გაიმართა. ფორმულას დირექტორის, ზურაბ გუმბარიძის განცხადებით, დავით კეზერაშვილის წინააღმდეგ შეტანილი სარჩელი მედიის წინააღმდეგ არსებული კამპანიის ნაწილია. გუმბარიძე არ გამორიცხავს მედიასაშუალების ქონების დაყადაღებასაც.

ამ მოვლენებს ევროპარლამენტარი მარკეტა გრეგოროვაც გამოეხმაურა. მისი განცხადებით, ბოლო პერიოდში მომხდარი ძალადობრივი მოვლენების გათვალისწინებით, წინასაარჩევნოდ მედიაზე ზეწოლა გასაკვირი არაა.

გაიგე მეტი:

• როგორც ჩანს, ივანიშვილის ახალი სამიზნე კიდევ ერთი კრიტიკული მედიის გაჩუმებაა — კეკენაძე ფორმულაზე
• კეზერაშვილის წინააღმდეგ წარდგენილი სარჩელის მიზანი კრიტიკულ ტელევიზიაზე ზეწოლაა — მედიაკოალიცია
• სოლიდარობა კრიტიკულ მედიას და მებრძოლ ჟურნალისტებს — სირცხვილია ფორმულაზე