სახალხო დამცველი, ნინო ლომჯარია კრიტიკულად აფასებს პოლიტიკოსების მხრიდან ჟურნალისტების მიმართ ცინიკურ და აგდებულ დამოკიდებულებას. მისი თქმით, ეს მედიისკენ მიმართულ ძალადობრივ ფონს ახალისებს. ამის შესახებ მან წინასაარჩევნო გარემოს შეფასებისას ისაუბრა.

"ძალიან კრიტიკულად ვაფასებ იმას, რომ ჩვეულ პრაქტიკად ჩამოყალიბდა პოლიტიკური თანამდებობის პირთა მხრიდან ჟურნალისტების, განსაკუთრებით, კრიტიკულად განწყობილი მედიის წარმომადგენლების მიმართ ცინიკური და აგდებული დამოკიდებულება და მათი დისკრედიტაციისკენ მიმართული განცხადებები, რაც ვფიქრობ, რომ ასევე ახალისებს მედიის წარმომადგენელთა მიმართ არსებულ ძალადობრივ ფონს", — აღნიშნა ომბუდსმენმა.

გუშინ, 29 სექტემბერს, თბილისის მერმა, კახა კალაძემ შეურაცხმყოფელი ტერმინოლოგიით მოიხსენია მთავარი არხის ჟურნალისტები და კითხვის პასუხად ტელეკომპანიის წარმომადგენელს უთხრა, რომ მათზე უფრო "დიდი რადიკალები" და "უბინძურესი ადამიანები" ქვეყანაში არ არსებობენ. ამ ფორმით კალაძე გამოეხმაურა ჟურნალისტის რეპლიკას მედიის დევნის, 5 ივლისისა და ევროკავშირის ოფისის წინ ქართული ოცნების აქტივისტების მობილიზების შესახებ.

ეს პირველი შემთხვევა არ არის, როდესაც კახა კალაძე, ისევე, როგორც ქართული ოცნების ლიდერები ოპოზიციურ და კრიტიკულ მედიას თავს ესხმიან, კითხვებს არ პასუხობენ ან მათ მიმართ აგრესიულად არიან განწყობილნი. დიდი ხნის განმავლობაში ისინი საერთოდ უარს ამბობდნენ მათთან კომუნიკაციაზე, ეთერებში მისვლასა და ინდივიდუალური კომენტარების ჩაწერაზე.

მმართველი გუნდი მსგავსი დამოკიდებულების გამო არაერთხელ გააკრიტიკა მედიის საკითხებზე მომუშავე არასამთავრობო ორგანიზაციებმა. ისინი აღნიშნავდნენ, რომ ეს აძლიერებს პოლარიზაციას და ჟურნალისტებს საფრთხეს უქმნის, რადგანაც ახალისებს ძალადობრივ ჯგუფებს.