საქართველოს პარლამენტის წევრი თამარ კორძაია აცხადებს, რომ ცესკო ქართული ოცნების მტრობის გამაღვივებელი კამპანიის ხელშემწყობი და წამქეზებელი გახდა, როცა ე.წ. სისხლიან ბანერებში სამართალდარღვევა ვერ აღმოაჩინა. კორძაია ამბობს, რომ "არა ნაცებს, არა ბოროტებას, არა ღალატს" ბანერები არამხოლოდ კერძო პირის დაკვეთილია, არამედ მმართველი გუნდის საარჩევნო კამპანიის ნაწილია.

"რასაც ჩვენ ვუყურებთ დღეს ქვეყანაში არჩევნების დღემდე რამდენიმე დღით ადრე, ეს არის ერთი რამ ცენტრალური საარჩევნო კომისია მორჩილად ასრულებს ქართული ოცნების დავალებებს, ის დანაშაულებრივ გარიგებაშია ქართულ ოცნებასთან და სამართლებრივადაც კი იღებს უკანონო გადაწყვეტილებებს იმისათვის, რომ პოლიტიკურ პარტიებსა და მოქალაქეებს შორის გააღვივოს სიძულვილი და მტრობა.

გვაქვს რეალური საფუძველი, რომ ეს ცესკო არ შეასრულებს საქართველოს ამომრჩევლის ნებას და რისკის ქვეშ დააყენებს, ისევე როგორც ყველა კანონიერ გადაწყვეტილებას აყენებს არჩევნებამდე", — აღნიშნა კორძაიამ.

On.ge ცესკო-ს დაუკავშირდა, თუმცა უწყებაში ამაზე კომენტარის გაკეთება არ ისურვეს.

გუშინ, 28 სექტემბერს ცენტრალურმა საარჩევნო კომისიამ გაავრცელა განცხადება და აღნიშნა, რომ ე.წ. სისხლიანი ბანერების გაკვრა სამართალდარღვევად არ მიიჩნია. ცესკო განმარტავს, რომ საარჩევნო ადმინისტრაციამ დეტალურად მოიკვლია ბანერების თემა და დაადგინა, რომ ბანერების დამკვეთი არის ფიზიკური პირი, რომელმაც შპს ალმას მათი დამზადება/განთავსება შეუკვეთა. ცესკოს მტკიცებით, კერძო პირის წერილობითი პასუხებიდან ირკვევა, რომ საჩივრებში მითითებული ბანერების დამზადება/განთავსება რომელიმე პოლიტიკური პარტიის, საარჩევნო სუბიექტის დაფინანსებით არ მომხდარა.

ცესკო-ს თავმჯდომარის ოპოზიციური პარტიების კვოტით არჩეულმა მოადგილემ, გიორგი სიორიძემ დღეს განაცხადა, რომ ეს გადაწყვეტილება პირადად თავმჯდომარემ, გიორგი კალანდარიშვილმა მიიღო. ის ამბობს, კომისიას ამის შესახებ არც ოფიციალურ და არც არაოფიციალურ ფორმატში არ უმსჯელია.

17 სექტემბერს, თბილისში გვიან ღამით ბანერი წარწერით "არა ნაცებს, არა ბოროტებას" ისევ გამოჩნდა. Facebook-ზე გავრცელდა ფოტოც, სადაც ჩანს, რომ პოლიტიკური პლაკატი ვაქცინაციის მოწოდების ბანერს გადააკრეს. 18 სექტემბერს NCDC-მა განცხადება გაავრცელა და ვაქცინაციის მოწოდების ბანერების ჩანაცვლება დაგმო.

თავად კომპანია ალმამ განცხადება გაავრცელა, სადაც განმარტავენ, რომ ფუნქცია მხოლოდ ბილბორდების კონსტრუქციის ფართის გაყიდვა/გაქირავებაა და მათ ვიზუალზე პასუხისმგებლობას იხსნიან. თუმცა, კომპანიაში, ასევე, აცხადებენ, რომ ე.წ. "სისხლიანი" ბანერების შინაარსი მათთვის მიუღებელია. კომპანიის განცხადებაში არაფერია ნათქვამი ხელშეკრულების დარღვევაზე.

გაიგე მეტი: