თბილისის მერის, კახა კალაძის განცხადებით, ვაშლიჯვარში, მაჭავარიანის ქუჩაზე მეწყერსაშიში ფერდის გამაგრების სამუშაოები დასრულებულია. მისი თქმით, ამჟამად გამწვანებისა და სანიაღვრე სისტემების მოწყობის სამუშაოები მიმდინარეობს, რომ ფერდზე წყლის არიდება მოხდეს.

"ჩვენ, როდესაც აღვადგინეთ საავტომობილო მოძრაობა, მაშინ საზოგადოებას ვაცნობეთ, რომ დარჩენილი იყო ფერდის გამაგრების სამუშაოების მცირე ნაწილი და ეს სამუშაოები, დღეს შემიძლია გითხრათ, რომ მთლიანად არის დასრულებული. ამ ხნის განმავლობაში მასშტაბური სამუშაოები განხორციელდა მეწყრულ ზონაში: დამონტაჟდა მონიტორინგის სისტემა, რაზეც მთელი, ყოველდღიურად, ყოველ სააათობრივად და ყოველ წუთიერად მიმდინარეობს მონიტორინგი. იგივე გაკეთდა შეშელიძის ქუჩაზე, იგივე გაკეთდა მაჭავარიანის მეწყრულ ფერდზე და მიმდინარეობს დაკვირვების რეჟიმი.

ფერდიდან მოიხსნა დიდი მოცულობის მიწა, შეიქმნა ე.წ. წინაღობები, გაკეთდა ჭაბურღილები, განხორციელდა ცემენტაცია, ასევე, გამოყენებული იქნა ანკერები, იმისთვის, რომ მაქსიმალურად, ყველანაირად უსაფრთხო იყოს ეს ფერდი. გადაადგილების თვალსაზრისით, უკვე დიდი ხანია, უსაფრთხოა, ამაზე ვისაუბრეთ ჩვენ", — განაცხადა კალაძემ.

17 მარტს ფორუმზე გავრცელდა ფოტოები, სადაც ჩანს, რომ ვაშლიჯვრისა და ნუცუბიძის დამაკავშირებელი გზის ფერდობზე ნაპრალები გაჩნდა. ფოტოების გავრცელებამდე, დილით, თბილისის მერმა, კახა კალაძემ განაცხადა, რომ მაჭავარიანის ქუჩაზე მეწყრული პროცესების გააქტიურების გამო ტრანსპორტის მოძრაობა ორმხრივად შეიზღუდებოდა. კალაძეს არ უთქვამს ზუსტად როდის დაიწყო ეს პროცესები, თუმცა აღნიშნა, რომ დამეწყრილი უბნის შესწავლაში მერიის სამსახურებთან ერთად, შესაბამისი უწყებების სპეციალისტები უკვე ჩართულნი იყვნენ.