დღეს, 29 სექტემბერს საგარეო ურთიერთობათა და ევროპასთან ინტეგრაციის კომიტეტების გაერთიანებული სხდომაზე ხმაური იყო, რაც ნაციონალური მოძრაობის ერთ-ერთი ლიდერის, თინა ბოკუჩავას მიერ გაკეთებულ განცხადებას მოჰყვა იმის შესახებ, რომ ევროინტეგრაციის კომიტეტს არ ჰქონდა კვორუმი და ამის გამო არ იყო უფლებამოსილი სხდომაში მონაწილეობა მიეღო.

"რამდენადაც მე მაქვს ინფორმაცია, თქვენ არ გაქვთ კვორუმი, ქალბატონო მაკა, შესაბამისად არ არის უფლებამოსილი ეს სხდომა, რომ თქვენმა კომიტეტმა მიიღოს მონაწილეობა.

ბატონი ხელაშვილი და ქალბატონი მარიამი არ არიან ევროინტეგრაციის კომიტეტში და თუ არის ჩანაცვლების წერილები, მე მოვითხოვე, რომ ჩანაცვლების წერილები მაჩვენოთ, რომელიც ჯერჯერობით არ მიმიღია", — განაცხადა ენმ-ის დეპუტატმა კომიტეტზე.

ამასთან, ბოკუჩავა მოუწოდებდა ევროინტეგრაციის კომიტეტის თავმჯდომარეს, მაკა ბოჭორიშვილს, რომ კარლ ჰარცელის განცხადებასთან დაკავშირებით შეფასება გაეკეთებინა, რაზეც პასუხად მიიღო ის, რომ მას არ აქვს უფლება რეგლამენტის მიხედვით, რაიმე საკითხი დაამატოს დღის წესრიგს.

"ქალბატონო თინა, მორჩით ახლა დესტრუქციას რა, მორჩით დესტრუქციას, არანაირად არ გაქვთ თქვენ უფლება რეგლამენტის მიხედვით რაიმე საკითხი ახლა დაამატოთ და ამიტომ, მორჩით ამ დესტრუქციას და გადავიდეთ კონსტრუქციაზე. შემდეგ გავიაროთ ეს ორი საკითხი და იქნებ გეთანხმებით ამ მესამე საკითხის დამატებაში. რა წესია ეს საერთოდ, რა ქცევა არის, კომიტეტზე ვართ თუ ტყეში ვართ, ვერ გავიგე, დაწყნარდით, დამშვიდდით და გავაგრძელოთ სხდომა", — განაცხადა პარლამენტის საგარეო ურთიერთობათა კომიტეტის თავმჯდომარემ, ნიკა სამხარაძემ.

22 სექტემბერს ჰარცელმა გავრცელებულ ფაილებსა და სავარაუდო მოსმენებზე თქვა, რომ ბუნებრივად არ მიაჩნიათ, როდესაც პარტნიორი და მეგობარი ქვეყანა, როგორიც საქართველოა, მათი წინააღმდეგ მიმართული მსგავსი ტიპის საქმიანობაში იყოს ჩართული. მისივე განცხადებით, აღნიშნულიდან გამომდინარე, საქართველოს ელჩი ევროკავშირში, ვახტანგ მახარობლიშვილი სახელმწიფო უსაფრთხოების სამსახურიდან გამოჟონილ ფაილებთან დაკავშირებით ბრიუსელში დაიბარეს.