ერთიანი ნაციონალური მოძრაობის ერთ–ერთი ლიდერის, ხატია დეკანოიძის განცხადებით, ფარული ჩანაწერების გავრცელებასთან დაკავშირებით, სახელმწიფოს უსაფრთხოების სამსახურის ხელმძღვანელის, გრიგოლ ლილუაშვილის სამართლებრივი პასუხისმგებლობა უნდა დადგეს.

"ლილუაშვილი ვერსად ვერ დაიმალება და ვერსად ვერ დაიმალება ყველა ის ადამიანი, რომლებიც საკუთარი ბუნაგიდან უსმენენ და გვისმენენ ყველას", — თქვა დეკანოიძემ მთავარი არხის ეთერში.

მან, ასევე, აღნიშნა, რომ სუს–ის ხელმძღვანელი პირდაპირ ბიძინა ივანიშვილს ემორჩილება და ის პარლამენტთან და თავად ქვეყნის მოსახლეობასთან ანგარიშვალდებულებას არ გრძნობს.

"ამ ადამიანს უნდა ახსოვდეს კარგად, რომ ბევრი გვინახავს ასეთი გაბღენძილი ჩინოვნიკები, რომლებიც ყველანაირი ძალაუფლება ჰქონიათ და შემდეგ ეს ძალაუფლება ბოროტად გამოუყენებიათ, მაგრამ, ზოგადად, ისტორიის კანონზომიერება არის ის, რასაც საქართველოს მოქალაქეების ნება სჭირდება და გადაწყვეტს საქართველოს მოქალაქეების ნება", — აცხადებს დეკანოიძე.

დღეს, გრიგოლ ლილუაშვილმა ფარული ჩანაწერების გავრცელებასთან დაკავშირებით პირველი კომენტარი გააკეთა. "მე რა შუაში ვარ?" — ასე პასუხობს სახელმწიფო უსაფრთხოების სამსახურის უფროსი, გრიგოლ ლილუაშვილი კითხვას, გავრცელებულ ფაილებთან დაკავშირებით დაიბარეს თუ არა გამოკითხვაზე. ხოლო მისი გადაგომის მოთხოვნასთან დაკავშირებით ამბობს, რომ ოპოზიციის ჭკუაზე ვერ ივლის.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ჩანაწერების მიხედვით, უსმენენ და უთვალთვალებენ ელჩებსა და საელჩოების თანამშრომლებსაც. ფაილებში დაარქივებულია ევროკავშირის ელჩისა და მისი თანამშრომლის საუბარი. თავდაპირველად, ელჩი თანამშრომელს პროტოპრესვიტერ გიორგი ზვიადაძის ნომერს სთხოვს, შემდეგ კი მიმდინარე საკითხებზე თავის პოზიციას აფიქსირებს.

გაიგეთ მეტი გავრცელებულ ჩანაწერებზე: