"ძეგლს ვერ დაუდგამდა იქ და ტრიბუნაზეც ვერ დაიდებდა" — ასე პასუხობს ქართული ოცნების დეპუტატი, ბექა დავითულიანი ჟურნალისტის კითხვას თბილისის მერის, კახა კალაძის მიერ დებატებისას უფასო სასადილოდან მიტანილი ქილის გადაგდებასთან დაკავშირებით.

"არაა საჭირო გაკაპასებული კითხვები, გუშინ ლეიბორისტების კანდიდატი იყო თავისთავად მისული იქ პროვოკაციისთვის, იტყუებოდა, როდესაც მიუტანა ნივრით თუ წიწაკით სავსე ქილა კანდიდატს და უთხრა, რომ ეს არის დღიური რაციონი", — განაცხადა დავითულიანმა.

გუშინ, 21 სექტემბერს, ლეიბორისტული პარტიის მერობის კანდიდატმა, მიხეილ ქუმსიშვილმა ქართული ოცნების მერობის კანდიდატს, კახა კალაძეს საზოგადოებრივი მაუწყებლის ეთერში გამართულ დებატებში ქილით უფასო სასადილოს საკვები მიუტანა, კალაძემ კი ქილას თითი ჰკრა და ტრიბუნიდან გადააგდო.