პარტია დროას ლიდერი, ელენე ხოშტარია ჩანაწერების ნამდვილობას ადასტურებს. მისი თქმით, თეა გოდოლაძესთან საუბარი და ამასთან, 2019 წლიდან ოფისის დაქირავებასთან დაკავშირებული საკითხები დეტალურად არის აღწერილი ფაილებში.

"ჩემზე რაც წერია, აბსოლუტურად ყველაფერი დასტურდება, აბსოლუტურად ყველაფერი. ერთი იყო თეა გოდოლაძესთან საუბარი, რომელსაც ნამდვილად ვადასტურებ და ერთი იყო ეპიზოდი, როდესაც 2019 წლის შემდეგ აღწერილი აქვთ დეტალურად ვისგან ვიქირავე ოფისი, რამდენად ვიქირავე, ვისგანაც ვიქირავე, იმის ოჯახის წევრები, რამდენად უნდა მომეწესრიგებინა ოფისი", — განაცხადა ხოშტარიამ ფორმულას ეთერში.

მისივე თქმით, აპირებს, რომ ამ საქმეს მისცეს სამართლებრივი მსვლელობა.

13 სექტემბერს ცნობილი გახდა, რომ ერთ-ერთი ღია წყაროზე საპატრიარქოსთან დაკავშირებით მასალები აიტვირთა. ჩანაწერებში საუბარია სასულიერო პირების პირად ცხოვრებაზე და იკვეთება სხვადასხვა დანაშაულის ნიშნები, მათ შორის პედოფილიისა და სექსუალური ძალადობის შესახებ.

უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ათასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი გავრცელებულ ჩანაწერებზე: