"ქურდს ქუდი ეწვისო" — ასე უპასუხა პრემიერმინისტრმა, ირაკლი ღარიბაშვილმა თბილისის მერობის კანდიდატის, გიორგი გახარიას ნარკოტესტთან დაკავშირებულ კითხვას. მისი თქმით, თუ გახარიას დასამალი არაფერი აქვს, ნებისმიერ ადგილას შეუძლია ტესტის ჩაიტაროს.

"ხალხური, ბრძნული გამონათქვამი ქურდს ქუდი ეწვისო, ხომ გაგვიგია ყველას? ძალიან მარტივია. ვისაც დასამალი არაფერი არ აქვს, ღიად, ნებისმიერ მოედანზე, ნებისმიერ ბიუროში უნდა მივიდეს და ჩააბაროს ტესტი. ასე რომ, ძალიან მარტივია, მე მგონი, აქ კითხვები არ არსებობს", — განაცხადა ირაკლი ღარიბაშვილმა.

თბილისის მერობის კანდიდატი, გიორგი გახარია ნარკოტესტის ჩასატარებლად ავსტრიაში იმყოფებოდა. ის ამბობს, რომ ტესტის შედეგებს მიღებისთანავე გაასაჯაროებს. იქამდე, მან უარი განაცხადა ნარკოტესტის სამხარაულის ეროვნულ ბიუროში ჩატარებაზე, მიზეზად კი დაასახელა, მისი თქმით, ბიუროდანვე მიღებული ინფორმაცია იმის შესახებ, რომ ქართული ოცნება პროვოკაციას უმზადებდა.

ნარკოტესტი პირველად ქართული ოცნების მერობის კანდიდატმა, კახა კალაძემ ჩაიტარა, ეს ჯანსაღი ცხოვრების პოპულარიზაციით ახსნა და სხვა კანდიდატებსაც იგივე მოუწოდა. მოწოდების საპასუხოდ, გახარიამ განაცხადა, რომ ოპონენტებმა მასთან დებატებზე პირისპირ დაჯდომის შიშით "ბანკებით" სირბილი დაიწყეს. 10 სექტემბერს მან, ასევე, განაცხადა, რომ ახლო მომავალში ნარკოტესტთან დაკავშირებით "საინტერესო ინფორმაციას" გაამხელდა.

გაიგე მეტი: