ამომრჩევლის მიერ ამომრჩეველთა ერთიან სიაში ცვლილების შეტანის მოთხოვნის ვადა დღეს, 14 სექტემბერს, 18:00 საათზე იწურება. ცენტრალური საარჩევნო კომისია ამომრჩევლებს კიდევ ერთხელ მიმართავს, მაღალი სამოქალაქო პასუხისმგებლობა გამოიჩინონ და ამომრჩეველთა ერთიან სიაში საკუთარი და ოჯახის წევრების მონაცემები გადაამოწმონ.

ცესკოს განცხადებით, იმ შემთხვევაში, თუ თქვენი ან ოჯახის წევრების მონაცემებში აღმოაჩენთ უზუსტობას, დღეს, 18:00 საათამდე საუბნო ან საოლქო საარჩევნო კომისიას განცხადებით უნდა მიმართოთ და ამომრჩეველთა სიაში ცვლილების შეტანა მოითხოვოთ.

"ამომრჩეველთა ერთიან სიაში მონაცემების გადასამოწმებლად ცესკო არაერთ სერვისს გთავაზობთ: შეგიძლიათ ეწვიოთ ცესკოს ოფიციალურ ვებგვერდს cesko.ge, შესაბამის ველში შეიყვანოთ პირადი მონაცემები და გადაამოწმოთ თქვენი და თქვენი ოჯახის წევრების მონაცემები", — აცხადებს ცესკო.

ამომრჩეველთა ერთიან სიაში საკუთარი მონაცემების გადამოწმება ამომრჩეველს კომპიუტერის, პლანშეტის, მობილურისა და სწრაფი გადახდის აპარატის საშუალებით შეუძლია. ასევე, შეგიძლიათ მიხვიდეთ იმ საუბნო საარჩევნო კომისიის მისამართზე, სადაც ხართ რეგისტრირებული და მონაცემები ამომრჩეველთა ერთიანი სიის საჯარო ვერსიაში ადგილზე გადაამოწმოთ.

"ასევე, შეგიძლიათ დაგვიკავშირდეთ ცესკოს სატელეფონო ცენტრის შემდეგ ნომერზე — 2 51 00 51. ამასთანავე, შეგახსენებთ, რომ 15 სექტემბერს სახელმწიფო სერვისების განვითარების სააგენტო გადმოგვცემს განახლებულ მონაცემებს, რომლის საფუძველზეც დგება ამომრჩეველთა ერთიანი სია 2 ოქტომბრის არჩევნებისთვის", — აღნიშნავს ცესკო.

საქართველოში ადგილობრივი თვითმმართველობის არჩევნები 2 ოქტომბერს გაიმართება.