თბილისის მერობის კანდიდატი, თამარ კეკენაძე 2001 წლის 11 სექტემბერს ტერორისტული ორგანიზაცია ალ-ქაიდას მიერ ნიუ-იორკში, მსოფლიო სავაჭრო ცენტრის ტყუპ ცათამბჯენებზე განხორციელებულ ტერაქტს ეხმაურება. ის ტერორიზმთან ბრძოლაში საქართველოს როლზე საუბრობს და აცხადებს, რომ ოკუპაციის პირობებში ამას კიდევ უფრო დიდი მნიშვნელობა ენიჭება.

"11 სექტემბრის ტერაქტიდან 20 წელი გავიდა. ამ ტრაგიკულმა დღემ მთელი ცივილური მსოფლიო გაგვაერთიანა საერთო ამოცანის ირგვლივ — აღარასოდეს დავუშვათ ტერორიზმის გამარჯვება თავისუფალ სამყაროზე.

წლებია საქართველოს ღირსეული წვლილი შეაქვს ამ ბრძოლაში [...] რუსული ოკუპაციის პირობებში მყოფი ქვეყნისთვის, განსაკუთრებით მნიშვნელოვანია ჩვენი ქვეყნის როლის და ფუნქციის გადააზრება საერთაშორისო ტერორიზმთან ბრძოლის პროცესში", — განაცხადა თამარ კეკენაძემ.

ის ამბობს, რომ მნიშვნელოვანია მსჯელობის დაწყება იმაზე, თუ როგორ უნდა უპასუხოს ქვეყანამ რეგიონში რუსეთის როლის გაძლიერებითა და ავღანეთში თალიბანის ხელისუფლებაში მოსვლით შექმნილ ახალ გამოწვევებს.

"მნიშვნელოვანია, რომ ქვეყნის უსაფრთხოების და ეროვნული ინტერესების საკითხებზე შევძლოთ პოლიტიკური პოლარიზებისგან თავისუფალი, გონივრული და ერთობლივი პოზიციონირება ჩვენს საერთაშორისო პარტნიორებთან", — აცხადებს კეკენაძე.

2001 წლის 11 სექტემბერს ალ ქაიდას ტერორისტებმა United Airlines-ის ორი გატაცებული თვითმფრინავი დილით, სამუშაო დღის დაწყებისას ნიუ-იორკის ორ ცათამბჯენს დააჯახა. შედეგად, 2 996 ადამიანი დაიღუპა, მათგან 2 606 სავაჭრო ცენტრში და მის მიმდებარედ იყო.

თამარ კეკენაძე თბილისის მერობის კანდიდატად ახალმა პოლიტიკურმა პლატფორმა, მესამე ძალამ წარადგინა.

გაიგე მეტი: