საქართველოს მოქალაქეები, რომელთა შემოსავალიც წლიურად 40 ათას ლარს აღემატება, საყოველთაო ჯანდაცვის პროგრამით ვეღარ ისარგებლებენ. რეგულაციები, რომლის განხილვაც მთავრობის სხდომაზე იგეგმება და ძალაში მთავრობის დასტურის შემდეგ შევა, ჯანდაცვის სამინისტრომ დღეს გაასაჯაროვა.

უწყება ინფორმაციას კიდევ სამი მიმართულებით ავრცელებს:

  1. მიზნობრივ ჯგუფში შემავალ მოქალაქეებს საყოველთაო ჯანდაცვის პროგრამით გათვალისწინებული სერვისები უცვლელად შეუნარჩუნდება და ამბულატორიულ მედიკამენტებთან წვდომა დაემატება. გულ-სისხლძარღვთა დაავადებები, დიაბეტის II ტიპი, ბრონქიალური ასთმა, ფილტვების ქრონიკული ობსტრუქციული დაავადებები - ეს იმ დაავადებათა ჩამონათვალია, რომლის სამკურნალო მედიკამენტებიც, პროგრამის ფარგლებში დაფინანსდება;
  2. ცვლილებები განხორციელდა საშუალო და დაბალი შემოსავლის მქონე მოქალაქეების სერვისებიც მოცულობაშიც;
  3. მოზარდებსა და იმ მოქალაქეებს, რომელთა სარეიტინგო ქულა 70 000-დან 100 000-მდეა, სერვისების მოცულობა უცვლელად შეუნარჩუნდებათ. მიზნობრივ ჯგუფებს, მოზარდებს, დაბალი და არარეგულარული შემოსავლისა და 70 000-დან 100 000-მდე სარეიტინგო ქულის მქონე მოქალაქეებს კერძო სადაზღვევო შუამავლების პაკეტით სარგებლობის პრივილეგია მიენიჭათ.

პროგრამის ფარგლებში, მშობიარობა ყველა ჯგუფში შემავალ მოქალაქეებს დაუფინანსდებათ. გარდა ამისა, სამინისტრო განმარტავს, რომ საყოველთაო ჯანდაცვის პროგრამის სერვისების მოცულობა განისაზღვრება ინდივიდუალური (და არა ოჯახის) შემოსავლის მიხედვით.