საქართველოს მთავრობის ადმინისტრაციაში გამართულ ერთობლივ ბრიფინგზე პრემიერმინისტრმა ირაკლი ღარიბაშვილმა განაცხადა, რომ სომხეთის მთავრობის მეთაურს აზერბაიჯან-სომხეთს შორის მედიაციის სრული მზაობა კიდევ ერთხელ დაუდასტურა. ამ თემაზე საუბრისას ღარიბაშვილმა მთიანი ყარაბაღის მეორე ომის შედეგად სომეხი ტყვეების გათავისუფლებისა და აზერბაიჯანსითვის რუკების გადაცემის საქმეში მის როლს გაუსვა ხაზი.

მისივე თქმით, რეგიონის მთავარი მიზანი მშვიდობა, სტაბილურობა და კეთილდღეობაა

"მე პრემიერს კიდევ ერთხელ დავუდასტურე სრული მზაობა იმისა, რომ საქართველომ აქტიური მედიაციის როლი გააგრძელოს, იმისთვის რომ ნდობა აღდგეს. ნდობა, რომელიც არის ძალიან მნიშვნელოვანი და საფუძველთა საფუძველი ჩვენი შემდგომი თანამშრომლობის. ჩვენ მზად ვართ განვიხილოთ ახალი თანამშრომლობის იდეები, ახალი პროექტები", — განაცხადა ირაკლი ღარიბაშვილმა.

ნიკოლ ფაშინიანი საქართველოს დღეს, 8 სექტემბერს ოფიციალური ვიზიტით ეწვია. მთავრობის ადმინისტრაციის ინფორმაციით, ფაშინიანი შეხვედრას პრეზიდენტ სალომე ზურაბიშვილთანაც გამართავს.