შრომის ინსპექციის სამსახურის უფროსის, ბექა ფერაძის განცხადებით, ჯანდაცვის სამინისტრომ შეიმუშავა აპლიკაცია, რომელიც QR კოდის წამკითხველით მოქალაქის კოვიდსტატუსის იდენტიფიცირებას მოახდენს. მისი თქმით, პერსონალური მონაცემები აბსოლუტურად დაცული იქნება.

"სამინისტროს გუნდის მიერ შემუშავებულია სპეციალური აპლიკაცია კოვიდსტატუსის დადგენის მიზნით, ე.წ. COVID Pass-ის აპლიკაცია, რომელიც QR კოდის წამკითხველით ახდენს მოქალაქის კოვიდსტატუსის იდენტიფიცირებას. იცით, რომ ბევრ ქვეყანაში, ისევე როგორც ჩვენთან, ე.წ. მწვანე ზონებზე საკმაოდ აქტიურად მიმდინარეობს საუბარი.

ამ აპლიკაციის მეშვეობით აბსოლუტურად გათვალისწინებულია პერსონალური მონაცემების სრული დაცვა და მისი გამოყენებით მომხმარებელი ახდენს დადასტურებას, რომ ეთანხმება მისი ინფორმაციის დამუშავებას. აპლიკაცია მოიცავს ბოლო 72 საათში PCR ტესტის უარყოფით პასუხს, ასევე სწრაფი ტესტის უარყოფითი პასუხი ასახული იქნება 24 საათის განმავლობაში, ასევე აპლიკაციაში იქნება ინფორმაცია ვაქცინაციის სრული ან ორი დოზით, იმ შემთხვევაში, თუ აცრილია ადამიანი და ბოლო 6 თვის განმავლობაში თუ აქვს კოვიდი გადატანილი ესეც იქნება დაფიქსირებული აღნიშნულ აპლიკაციაში", — განაცხადა ფერაძემ.

მისივე თქმით, აღნიშნულ საკითხზე სამინისტრო აპლიკაციის მოხმარების შესახებ ბიზნესის წარმომადგენლებთან აქტიურ შეხვედრებს დაიწყებს.

მსგავსი აპლიკაცია ჯანდაცვის სამინისტროს 2020 წელსაც ჰქონდა შემუშავებული, თუმცა მიმდინარე წლის იანვარში გააუქმეს. აპლიკაციის საფასური 412 116 ლარი იყო. უწყების განმარტებით, ეპიდსიტუაციიდან გამომდინარე, ამის საჭიროება ვეღარ დაინახეს. მათივე ინფორმაციით, აპლიკაცია ავსტრიულმა კომპანიამ შეიმუშავა და ლიცენზიის საფასურის გადახდის გარეშე, სხვადასხვა ქვეყნის მთავრობისთვის ხელმისაწვდომი გახადა. უწყებაში თქვეს ისიც, რომ STOP COVID აპლიკაციის ტექნიკური მომსახურების საფასური (412 116 ლარი) მსოფლიო ბანკის, კორონავირუსზე გადაუდებელი რეაგირების პროექტის ფარგლებში რეტროაქტიულად ფინანსდებოდა.