საქართველოს შინაგან საქმეთა მინისტრის მოადგილის, ალექსანდრე დარახველიძის განცხადებით, 5 ივლისის საქმეზე არ არსებობს საკმარისი მტკიცებულება იმისთვის, რომ ზურაბ მახარაძისა სპირიდონ ცქიფურიშვილის წინააღმდეგ სამართლებრივი დევნა დაიწყოს. მისი თქმით, სახალხო დამცველი დასჯის მოთხოვნისას მხოლოდ საჯარო განცხადებებს ეყრდონა და მას სისხლის სამართლის საქმესთან წვდომა არ აქვს.

"რაც გავეცანი სახალხო დამცველის განცხადებას, ის ეყრდნობა მხოლოდ საჯარო განცხადებებს და საჯარო ჩანაწერებს. სისხლის სამართლის მასალებთან მიმართებაში მას წვდომა არ ჰქონია, შესაბამისად, პროკურორმა უნდა გადაწყვიტოს, თუკი არსებობს საკმარისი მტკიცებულებები, რომ წაუყენოს კონკრეტულ პირს ბრალი, ბუნებრივია, მოხდება ამ პირის ბრალდება. როგორც ჩემთვის ცნობილია, ამ ეტაპზე, არ არის საკმარისი მტკიცებულებები საქმეში", — ამბობს დარახველიძე.

მინისტრის მოადგილის აზრით, პოლიტიკურ მოტივებზე საუბარი გაუგებარია, რადგან საქმეზე 31 ადამიანი სისხლისსამართლებრივ პასუხისგებაშია მიცემული, 12 სისხლის სამართლის საქმე აქტიურ გამოძიებაშია და რამდენიმე პირის სახლში ჩატარებულია ჩხრეკა, მათ შორის, გაჩხრეკილია ალტ-ინფოს დამფუძნებლის, ზურაბ მახარაძის სახლიც.

"არაერთი პირი ვნახეთ ჩვენ გამოკითხვაზე დაბარებული, მათ შორის, იმ პირებზე, რომლებზეც საუბრობდნენ, რომ მათ მიმართ სახელმწიფო არის შემწყნარებელი, მათ სახლებში ჩატარდა ჩხრეკა, არაერთი ნივთია ამოღებული, დანიშნულია მათზე ექსპერტიზა და მიმდინარეობს გამოძიება და თუ არ შეიკრიბა საკმარისი მტკიცებულებები, ბუნებრივია, ვერ მოხდება კონკრეტული პირის მიმართ ბრალის წარდგენა", — აცხადებს დარახველიძე.

დღეს, 6 სექტემბერს, საქართველოს სახალხო დამცველმა გამართულ ბრიფინგზე 5 ივლისის საქმეზე ძალადობრივი და პრორუსული არხის, ალტ-ინფოს ერთ-ერთი წამყვანის, ზურაბ მახარაძისა და დეკანოზი სპირიდონ ცქიფურიშვილის მიმართ სისხლისსამართლებრივი დევნის დაწყებას მოითხოვა. მისი ცნობით, ომბუდსმენის აპარატმა აღნიშნული წინადადებით პროკურატურას უკვე მიმართა.

5-6 ივლისის ჰომოფობიური და ძალადობრივი კონტრაქციების ორგანიზატორები და ძალადობისკენ მომწოდებლები ამ დრომდე არ დაუკავებიათ, მიუხედავად იმისა, რომ კადრებში ცხადად ჩანს მახარაძის მიერ კონკრეტული ბრძანებების გაცემა, ასევე, დეკანოზ სპირიდონ ცქიფურიშვილის სიტყვები, რომ ისინი "ვალდებულები არიან იძალადონ". ძალადობრივ აქციაზე ფიზიკურად გაუსწორდნენ 50-ზე მეტ ჟურნალისტს, დაარბიეს თბილისი პრაიდის ოფისი, სცადეს სირცხვილის ოფისში შეჭრა და სავარაუდოდ, ხელნაკეთი ასაფეთქებელი მოწყობილობა ისროლეს ადამიანის უფლებათა ცენტრის ოფისში. აქციაზე ნაცემი ოპერატორი, ლექსო ლაშქარავა 11 ივლისს გარდაიცვალა.