ომბუდსმენი 5 ივლისის საქმეზე ძალადობრივი და პრორუსული არხის, ალტ-ინფოს ერთ-ერთი წამყვანის, ზურაბ მახარაძისა და დეკანოზი სპირიდონ ცქიფურიშვილის მიმართ სისხლისსამართლებრივი დევნის დაწყებას ითხოვს. ამის შესახებ ნინო ლომჯარიამ სპეციალურ ბრიფინგზე ისაუბრა და განაცხადა, რომ აღნიშნული წინადადებით საქართველოს პროკურატურას უკვე მიმართეს.

"დევნის დაწყების წინადადებას საფუძვლად დაედო საჯაროდ გავრცელებული ვიდეო მასალები, რომლითაც დასტურდება, რომ 5 ივლისის ძალადობრივ მოვლენებამდე ზურაბ მახარაძე და სხვა პირები განუწყვეტლივ აანონსებდნენ ძალადობას თბილისი პრაიდის მიერ დაგეგმილ ღონისძიებაში მონაწილე პირთა მიმართ. ძალადობრივი მოწოდებები, ასევე, მისი მხრიდან ისმოდა ჟურნალისტთა მისამართითაც. ამავე პირებმა სატელევიზიო ეთერით გაავრცელეს ჯგუფების შექმნის შესახებ, რომელთა პირდაპირი დანიშნულება იქნებოდა 5 ივლისს ძალადობა", — აცხადებს ომბუდსმენი.

მისივე თქმით, სახალხო დამცველის წინადადებაში დასაბუთებულია, რომ 5 ივლისამდე ზურაბ მახარაძე არა მარტო აანონსებდა ძალადობას, არამედ 5 ივლისს იგი უშუალოდ ხელმძღვანელობდა ჯგუფურ ძალადობას, მათ შორის, საკანონმდებლო ორგანოს წინ დადგმული საპროტესტო კარვების გატანას და სირცხვილიასა და პრაიდის ოფისების დარბევის მიზნით, სხვადასხვა ჯგუფების გამოყოფას.

რაც შეეხება დეკანოზ სპირიდონ ცქიფურიშვილს, ომბუდსმენის განცხადებით, დასაბუთებული ვარაუდის სტანდარტით დადგინდა, რომ 5 ივლისს ქართული მართლმადიდებლური ეკლესიის წარმომადგენელმა, დეკანოზმა სპირიდონ ცქიფურიშვილმა მიკროფონით, ხმის გამაძლიერებელი საშუალებით მოუწოდა მოქალაქეებს ძალადობისკენ, რითიც იმ ვითარებაში გასცდა ის გამოხატვის თავისუფლებას და ჩაიდინა საქართველოს სისხლის სამართლის კოდექსით აკრძალული ქმედება — ძალადობისკენ მოწოდება. რაც, ლომჯარიას თქმით, ქმნის ძალადობრივი ქმედების განხორციელების აშკარა პირდაპირ და არსებით საფრთხეს.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შეუშვა. მათ მეორედ ჩამოგლიჯეს და დაწვეს ევროკავშირის დროშა.

5-6 ივლისის ჰომოფობიურ კონტრაქციებზე დარბევებსა და ძალადობებს აორგანიზებდნენ და ძალადობისკენ მოწოდებებს აკეთებდნენ გურამ ფალავანდიშვილი, კონსტანტინე მორგოშია და ზურაბ მახარაძე. მათ შორის იყვნენ სასულიერო პირები, კერძოდ, დეკანოზი სპირიდონ ცქიფურიშვილი. მან ძალადობრივ კონტრაქციაზე შეკრებილებს მოუწოდა, რომ ისინი "ვალდებულები არიან იძალადონ". მიუხედავად იმისა, რომ 5-6 ივლისის მოვლენების შემდეგ საზოგადოება აქტიურად ითხოვს ორგანიზატორებისა და ძალადობის მომწოდებლების დასჯას, ისინი დაკავებულები არ არიან.