თბილისის მერობის კანდიდატი, კახა კალაძე აცხადებს, რომ მზადაა იდებატოს მერობის ყველა სხვა კანდიდატთან. ასე უპასუხა მან კონკურენტს, გიორგი გახარიას, რომელმაც კალაძე და მერობის კიდევ ერთი კანდიდატი, ნიკა მელია დებატებში გამოიწვია.

"ჩემთვის არაფრით არ განსხვავდება თუნდაც გიორგი გახარია, ნიკა მელია, იგივე ანა დოლიძისგან, იგივე რიჩარდისგან [ოგბუნუჯუ], იგივე სხვა კანდიდატებისგან. პირველ რიგში, ჩვენ, პოლიტიკოსებმა, უნდა ვისწავლოთ ერთმანეთის პატივისცემა. კახა კალაძე დაუჯდება ყველას, აბსოლუტურად. ამის შესაძლებლობა, დარწმუნებული ვარ, იქნება, შეიქმნება შესაბამისი პლატფორმა და გვექნება შესაძლებლობა, როგორც ნორმალურ, ცივილიზებულ, განვითარებულ ქვეყნებშია, წარიმართოს დებატები.

არაფრით არ გამოირჩევა გიორგი გახარია რიჩარდისგან, ან თუნდაც, ნიკა მელია ანა დოლიძისგან, რომ პირისპირ ამ ორ ადამიანს დავუჯდე მარტო დებატებში. ეს გამორიცხულია. ყველასთან მზად ვარ, რა თქმა უნდა, ვიდებატო და ეს იხილოს საზოგადოებამ", — განაცხადა კალაძემ რუსთავი 2-ის ეთერში.

"ქალმა რა გავაკეთო, გაგაშველოთ?" — ასე გამოეხმაურა გახარიას გაწვევას მერობის კიდევ ერთი კანდიდატი, ანა დოლიძე. მან დებატებში მხოლოდ კაცი კანდიდატების მონაწილეობის ინიციატივას სამარცხვინო უწოდა და თავისივე დასმულ რიტორიკულ კითხვას ასე უპასუხა: "ალბათ რამე საჭმელი უნდა გავუკეთო".