ყოფილი პრემიერმინისტრი, გიორგი გახარია ადასტურებს, რომ თბილისის მოქმედ მერთან, კახა კალაძესთან მერიაში იმყოფებოდა, რათა მისი კანდიდატურის დაყენების შესახებ "გაეფრთხილებინა". ამაზე მან TV პირველის ეთერში ისაუბრა.

"მოკლედ აგიხსნით, რა მოხდა. მე დღისით, მზისით, დაახლოებით 11 საათზე მივედი ღიად მერიაში, 21-ე სართულზე კალაძესთან, მხოლოდ და მხოლოდ ერთი მიზნით, რომ გამეფრთხილებინა, რომ დღეს მე გავხდებოდი მისი კონკურენტი და დავაყენებდი ჩემს კანდიდატურას, ეს იყო და ეს. ამის იქით, საერთოდ არაფერი ყოფილა. ანგარიშვალდებულებას რაც შეეხება, ჩემთვის ეს იყო უბრალოდ პატივისცემა იმ წლები თანამშრომლობის, რომელიც ჩვენ გვაკავშირებდა. ეს ჩემი პრინციპია, ჩემი ფასეულობები იყო და მე ვფიქრობ, სწორად მოვიქეცი", — თქვა მან.

გახარიას განცხადებით, ეს მხოლოდ "5-წუთიანი" შეხვედრა იყო, იმისთვის, რომ თუნდაც ქართულ პოლიტიკურ კულტურაში "რაღაცა ახალის შექმნის შესაძლებლობა" გაეჩინა, მაგრამ მისი თქმით, ეს ვერ გააჩინა და ამას "ბიძნური ჭორაობები" მოჰყვა.

"არაფერი, ეს იყო ორ ადამიანს შორის ადამიანური საუბარი. მე უბრალოდ ვუთხარი, რომ მე ვდგები და დღეიდან ვიქნები შენი კონკურენტი, ვსო", — განაცხადა გახარიამ.

გახარიას თქმით, თუ კალაძემ ნამდვილად ვერ გაიგო მათი შეხვედრის მიზანი, მაშინ შეხვედრას აზრი არც ჰქონია და შეცდა, რომ მივიდა.

"ეს არის პრინციპების თემა, ზოგიერთს ეს არ ესმის, მაგალითად, მე არ მინახავს, უბრალოდ შეიძლება ვცდები, მაგრამ თუ ეს სიმართლეა, ძალიან დამწყდა გული. ახლა რომ მოვდიოდი, მითხრეს, თურმე კალაძეს უთქვამს, ვერ გავიგე, რა უნდოდა, რისთვის მოვიდაო, სამწუხაროდ. ეს ნათქვამი მაძლევს მე იმის თქმის შესაძლებლობას, რომ ალბათ, მართლა შევცდი და ტყუილად მივედი" — აღნიშნავს ექსპრემიერი.

კალაძემ 2 სექტემბერს განაცხადა, რომ გახარიასთან შეხვედრის მიზეზები და მიზანი ვერ გაიგო. მისი თქმით, შეხვედრის სურვილი თავად გახარიამ გამოთქვა, რის შემდეგაც კალაძემ მერიაში მისვლა შესთავაზა.

შეხვედრის შესახებ ინფორმაცია ქართული ოცნების ლიდერებმა მას შემდეგ გაავრცელეს, რაც გახარიამ თქვა, რომ თბილისის მერობისთვის იბრძოლებს. ირაკლი კობახიძემ, მამუკა მდინარაძემ და კახა კალაძემ თქვეს, რომ გახარიას კალაძესთან კომუნიკაციის რამდენიმე მცდელობა ჰქონდა და საბოლოოდ, შეხვედრა პირველ სექტემბერს, თბილისის მერიაში შედგა. მეტიც, კობახიძე და მდინარაძე საუბრობენ იმაზე, თითქოს გახარია მზად იყო, ქართული ოცნების მხრიდან ფინანსური დახმარების სანაცვლოდ საკუთარი კანდიდატურა არ დაეყენებინა. თავად გახარიამ ქართული ოცნების ლიდერების ამ განცხადებებს ტყუილი უწოდა და თქვა, რომ მათ სიტყვას ფასი არ აქვს.

• ტყუილია თუ არა — რას ამბობს კალაძესთან შეხვედრაზე გახარია და რას ამბობენ მის პარტიაში

პირველ სექტემბერს ცნობილი გახდა, რომ ექსპრემიერი გიორგი გახარია თბილისის მერობისთვის იბრძოლებს. ამან მისი ყოფილი თანაგუნდელების მორიგი კრიტიკა გამოიწვია. მამუკა მდინარაძის განცხადებით, "მელიასთვის გადადგა და ახლა მელიას მეორე ტურში გასათრევად იწყებს ბრძოლას", ხოლო ირაკლი კობახიძე ამბობს, რომ "არჩევნები არ არის ოლიმპიადა, რომ ბრინჯაოს მედლისთვის იბრძოლო და "მესამე ადგილისთვის არ იბრძვიან არჩევნებში".