საქართველოს პრემიერმინისტრის, ირაკლი ღარიბაშვილის განცხადებით, ქვეყნის ჩაკეტვა "1 საათში შეუძლია", მაგრამ მისი თქმით, ეს გამოსავალი არ არის. ამის შესახებ მან ჟურნალისტებთან ისაუბრა.

"მაშინ საკოორდინაციო საბჭოს წევრი ვიყავი მეც და მთელი მთავრობა ვმართავდით ამ პროცესს, მაშინ არც ვაქცინა არსებობდა, მთელი ქვეყანა იყო დაკეტილი. ქვეყნის დაკეტვაზე მარტივი არაფერი არ არის, ერთ საათში შემიძლია გადავკეტო მთელი ქვეყანა, მაგრამ ეს არ არის გამოსავალი. ჩვენ არჩევანი მოვუტანეთ მოსახლეობას, ჩამოვიტანეთ 3 მილიონზე მეტი ვაქცინა და ეს არჩევანი თავად მოსახლეობამ უნდა გადაწყვიტოს", — განაცხადა მან.

ღარიბაშვილის თქმით, ქვეყნის ჩაკეტვა შეუძლებელია. ის ამტკიცებს, რომ მდგომარეობა სტაბილიზაციისკენ მიდის და მთელმა მსოფლიომ "ანალოგიური" სიტუაცია გაიარა. "ეს მეოთხე და მეხუთე ტალღები ყველგან მიმდინარეობს, ნუ აცდენსთ მოსახლეობას", — უთხრა პრემიერმინისტრმა ჟურნალისტს. მისი განცხადებით, ქვეყნის ეკონომიკის გახსნას ალტერნატივა არ აქვს, "მით უმეტეს, ჩვენნაირი პატარა ქვეყნისთვის".