ჰომოფობიური, პრორუსული და ძალადობრივი არხი, ალტ-ინფო სილქნეტს ისევ უჩივის. ისინი ითხოვენ, რომ კომპანიას დაევალოს, ყველა სამომხმარებლო პაკეტში განათავსოს ალტ-ინფოს სამაუწყებლო არხი და დაეკისროს სანქცია განთავსებაზე უარის თქმის გამო.

2 სექტემბერს კომუნიკაციების კომისიის სხდომაზე სილქნეტის წარმომადგენელმა განაცხადა, რომ კომპანია აპირებდა ალტ-ინფოსთან კომუნიკაციას, რადგან ტექნიკური გადაიარაღების პროცესი დასრულდა და უკვე შესაძლებელია ალტ-ინფოს სამომხმარებლო პაკეტში განთავსება.

"ახლიდან არის შემოტანილი კომპანიის მიერ, უბრალოდ, ინფორმაციას მოგაწვდით, ჩვენ ვაპირებდით ალტ-ინფოსთან დაკავშირებას მომდევნო კვირას, რადგან ამ კვირაში დასრულდა IT ტრანსფორმაციასთან დაკავშირებით ის ტექნიკური გადაიარაღების პროცესი და შესაბამისად მათი ჩართვის თაობაზე იქით კვირას უნდა გვქონოდა კომუნიკაცია", — განაცხადა სილქნეტის იურიდიული დეპარტამენტის უფროსმა, კახა ყურაშვილმა.

როგორც ორგანიზაცია მედიის უფლებების დირექტორმა, ნათია კაპანაძემ On.ge-ს განუცხადა, ალტ-ინფომ საჩივარი ზუსტად იდენტური საფუძვლით შეიტანა კომუნიკაციების კომისიაში.

"გუშინდელ სხდომაზე ცნობილი გახდა, რომ იდენტური საფუძვლით, რაც წინა ჯერზე იყო წარდგენილი, ეს არის სიგნალის განთავსება და არხის გავრცელება, შეიტანა საჩივარი ალტ-ინფომ და გუშინ როგორც დაფიქსირდა სხდომაზე, სილქნეტის გადაიარაღების პროცესი უკვე დასრულდა და კომპანიაც მზადაა, რომ ამ საკითხებთან დაკავშირებით განმცხადებელთან კომუნიკაცია გააგრძელოს.

მოულოდნელი იყო შეწყვეტა, თუმცა ეს არის განმცხადებლის პოზიციის მიხედვით. ჩვენ მოგვიანებით ვნახეთ, რომ განახლდა და ორგანიზაციას ისევ აქვს ინტერესი, რომ იდავოს არხის გავრცელებასთან დაკავშირებით", — ამბობს ის.

ალტ-ინფოს სახეები 5 ივლისს გამართულ კონტრაქციაზე შეკრებილ ჰომოფობიურ ჯგუფებს ძალადობისკენ მოუწოდებდნენ. სწორედ ამ დღეს ისინი ფიზიკურად გაუსწორდნენ 50-ზე მეტ ჟურნალისტს, თავს დაესხნენ მოქალაქეს და დაარბიეს თბილისი პრაიდის ოფისი, სცადეს სირცხვილიას ოფისის დარბევაც.

ალტ-ინფო უკვე ჩართო მაგთიკომმა, ხოლო სილქნეტმა უარი თქვა და ამის მიზეზად ტექნიკური პირობები დაასახელა. სწორედ ამის შემდეგ ძალადობრივმა და პრორუსულმა არხმა კომპანიას უჩივლა. 29 ივლისს გამართულ სხდომაზე ალტ-ინფოს დამფუძნებელმა, შოთა მარტინენკომ სილქნეტთან დაკავშირებით მათი საჩივრის განხილვის შეწყვეტა მოითხოვა. როგორც სხდომაზე აღინიშნა, მარტინენკომ საჩივრის არა დროებით შეჩერება, არამედ ამ საკითხზე წარმოების შეწყვეტა მოითხოვა.

ალტ-ინფოს საჩივარი მაუწყებლობის შესახებ საქართველოს კანონს ეყრდნობა, რომლის მიხედვით, საზოგადოებრივ მაუწყებელს, სათემო მაუწყებელს, ამ კანონის შესაბამისად ავტორიზებულ საერთო საეთერო ან/და თანამგზავრულ მაუწყებელს, რომელიც მაუწყებლობს მაუწყებლობის ტრანზიტზე ავტორიზებული პირის მომსახურების მიწოდების ზონაში (თანამგზავრული მაუწყებლის მაუწყებლობის ზონა ამ მუხლის მიზნებისათვის არის ქვეყნის მთელი ტერიტორია), აგრეთვე ავტორიზებულ საერთო საეთერო მაუწყებელს, რომლის მაუწყებლობა საეთერო მაუწყებლობის განხორციელების შედეგად ხელმისაწვდომია საქართველოს მოსახლეობის არანაკლებ 20%-ისათვის, უფლება აქვთ, მოსთხოვონ მაუწყებლობის ტრანზიტზე ავტორიზებულ პირს ასეთი მაუწყებლის სატელევიზიო არხის მომხმარებლისათვის შეთავაზებულ ყველა პაკეტში განთავსება ("სავალდებულო ტრანზიტი"). ამ შემთხვევაში მაუწყებელს არ წარმოეშობა მაუწყებლობის ტრანზიტზე ავტორიზებული პირისგან მაუწყებლის სიგნალის ტრანზიტისათვის ანაზღაურების მოთხოვნის უფლება.

ალტ-ინფო ძალადობრივი და პრორუსული არხია, რომელიც სიძულვილის გავრცელებას სხვადასხვა არხით ცდილობს. თავდაპირველად ის მხოლოდ ინტერნეტში "მუშაობდა", შემდეგ კი ტელევიზიაც დააფუძნეს და კომუნიკაციების კომისიამ მათ მაუწყებლობის უფლება მისცა. ალტ-ინფოს Facebook გვერდი არაერთხელ დაბლოკილა, წაშალეს მათთან დაკავშირებული ქსელიც. ისინი რამდენჯერმე ხელახლა დარეგისტრირდნენ და სხვა პლატფორმების გამოყენება დაიწყეს. 11 ივლისს კი, ალტ-ინფოს ვებგვერდიც გაუთიშეს. სწორედ ალტ-ინფო იყო 5 ივლისის ძალადობრივი კონტრაქციის თანაორგანიზატორი. მათი ტელეგრამის არხში აქტივისტების მიმართ ფიზიკური ანგარიშსწორებისა და სიცოცხლის მოსპობის მუქარები ვრცელდებოდა.