ლეგენდარული შვედური პოპჯგუფი, ABBA, 40 წლის შემდეგ პირველი სტუდიური ალბომით და ვირტუალური ტურნეთი ბრუნდება.

ABBA Voyage ნოემბერში გამოვა, რის შემდეგაც ვირტუალური კონცერტების სერია დაიწყება, სადაც ჯგუფის მსოფლიო ჰიტებს ციფრული ავატარები შეასრულებენ.

ალბომის შექმნის ისტორიის გახსენებისას, ოთხი წევრისგან შემდგარი ჯგუფი, რომელიც 1982 წელს დაიშალა, ამბობს, რომ სასცენო შოუზე მუშაობის დროს ხმისჩამწერ სტუდიაში აღმოჩდნენ.

"თავდაპირველად სულ ორი სიმღერა იყო, შემდეგ კი ვთქვით, იქნებ, კიდევ რამდენიმე ჩავწეროთო", — ამბობს ბენი ანდერსონი.

საბოლოოდ კი, ახალი ალბომი 10 სიმღერას მოიცავს. მათგან ორის პრემიერა უკვე შედგა ცოტა ხნის წინ გამართულ პრესკონფერენციაზე.

პირველის სახელწოდება I Still Have Faith In You ("მე ისევ მჯერა შენი") არის და როგორც ბიორნი ამბობს, ის სწორედ ჯგუფის ისტორიის შესახებაა.

"ეს [სიმღერა] იმის გააზრებაზეა, რამდენად რთულია, აღიქვა, სადაც ახლა ვართ. ვერანაირი წარმოსახვის უნარით წარმოვიდგენდით, რომ 40 წლის შემდეგ ალბომს გამოვუშვებდით, ისევ საუკეთესო მეგობრები ვიქნებოდით, ერთად ყოფნით ვისიამოვნებდით და ერთმანეთს ასე ვუერთგულებდით".

მეორე სიმღერა, Don't Shut Me Down ჯგუფის ერთ-ერთი ჰიტის, The Day Before You Came-ის ერთგვარი გაგრძელებაა, სადაც პროტაგონისტი ქალი წლების შემდეგ თავის პარტნიორს უბრუნდება.

ახალი სიმღერების გამოშვების გარდა, ჯგუფი, როგორც უკვე ვთქვით, ვირტუალურ ტურნეს გამართავს, რომელსაც ასევე ABBA Voyage ერქმევა. ტურნე მომავალ წლის 27 მაისს დაიწყება ლონდონში. ექვსი საღამოს განმავლობაში მასზე წარმოდგენილი იქნება ჯგუფის წევრების ციფრული ვერსიების — "აბატარების" — და 10 მუსიკოსისგან შემდგარი ცოცხალი ბენდის მიერ შესრულებული ABBA-ის 22 ძველი და ახალი სიმღერა.

"აბატარები".

ფოტო: Industrial Light and Magic

აღსანიშნავია, რომ კონცერტების სერიის შესაქმნელად უახლესი ციფრული ტექნოლოგიები გამოიყენეს. ეგრეთ წოდებული აბატარების შექმნაზე კი, რომლებიც ზუსტად ასახავს ჯგუფის წევრების შესრულების მანერას, 850 ადამიანი მუშაობდა.