საქართველოს პრემიერმინისტრის, ირაკლი ღარიბაშვილის განცხადებით, მთავარი არხის გენერალური დირექტორი, ნიკა გვარამია "გარყვნილების პროპაგანდისტია". ამ სიტყვებით მან ჟურნალისტს მიმართა მას შემდეგ, რაც მედიის წარმომადგენელმა ევროკავშირის დახმარების არმიღებაზე აშშ-ს ელჩის განცხადების შესახებ ჰკითხა.

"თქვენ საიდან ხართ, ბოდიში. ეს არის გვარამიას მესიჯი, გადაეცით გვარამიას, რომ ის არის გარყვნილების პროპაგანდისტი.

შავით თეთრზე წერია, რომ ეს იყო ჩვეულებრივი სესხის ხელშეკრულება. ჩვენი მოსახლეობა დაიღალა ამაზე ლაპარაკით, ამდენი პრობლემაა, ამაზე ილაპარაკეთ რეფორმებზე, პროექტებზე", — განაცხადა ღარიბაშვილმა.

ირაკლი ღარიბაშვილმა ევროკავშირის მაკროფინანსურ დახმარებაზე უარის თქმის შესახებ განცხადება 31 აგვისტოს გააკეთა. საქართველოს მთავრობის გადაწყვეტილებას გამოეხმაურა ევროკავშირიც. საქართველოში ევროკავშირის წარმომადგენლობის ხელმძღვანელის მოვალეობის დროებითი შემსრულებლის, ჟულიენ კრამპის განცხადებით, პატივს სცემენ ხელისუფლების გადაწყვეტილებას, არ მიიღოს ევროკავშირის მაკროფინანსური დახმარება, თუმცა აქვე აღნიშნავენ, რომ საქართველომ მისი მიღების პირობები ვერ შეასრულა. ევროკავშირის განცხადებით, საქართველოსთვის გასაცემი დახმარება დამოკიდებული იქნება ძირითადი რეფორმების განხორციელებისას მიღწეულ წინსვლაზე