პოლიტიკური პარტიები 2 ოქტომბრის თვითმმართველობის არჩევნებისთვის ემზადებიან. წინასაარჩევნო კამპანია აქტიურ ფაზაშია შესული, რომლის დასაფინანსებლადაც პარტიები, მათ შორის, შემოწირულობებს იღებენ.

როგორც აუდიტის სამსახურის მონაცემებიდან ხდება ცნობილი, 1-დან 27 აგვისტოს ჩათვლით პოლიტიკურმა პარტიებმა 5 111 500 ლარის შემოწირულობა მიიღეს, საიდანაც 87,7%, ანუ 4 480 355 ლარი მმართველ პარტიას, ქართულ ოცნებას ეკუთვნის. ქართულ ოცნების შემომწირველებს შორის 33 შპს და 238 ფიზიკური პირი იყო. მმართველ პარტიას იურიდიულმა პირებმა 241 500 ლარი, ხოლო ფიზიკურმა პირებმა 4 238 855 ლარი შესწირეს.

ამავე პერიოდში სხვა პარტიების მიერ მიღებულმა შემოწირულობის ჯამურმა ოდენობამ 631 145 ლარი შეადგინა. მათ შორის არიან: გახარიას პარტია (საქართველოსთვის), ლელო, ენმ და სხვა პოლიტიკური სუბიექტები.

იმ პარტიების ჩამონათვალი, რომლებმაც მიმდინარე წლის 1-27 აგვისტოს პერიოდში შემოწირულობები მიიღეს ასეთია:

  1. ქართული ოცნება-დემოკრატიული საქართველო — 4 480 355 ლარი;
  2. საქართველოსთვის — 239 139 ლარი;
  3. ლელო საქართველოსთვის — 169 500 ლარი;
  4. ერთიანი ნაციონალური მოძრაობა — 117 480 ლარი;
  5. ევროპული საქართველო — მოძრაობა თავისუფლებისთვის — 43 830 ლარი;
  6. საქართველოს პატრიოტთა ალიანსი — 23 590 ლარი;
  7. ელენე ხოშტარია — დროა — 20 710 ლარი;
  8. ხალხისთვის — 11 077 ლარი;
  9. თავისუფალი საქართველო — 3 190 ლარი;
  10. დემოკრატიული მოძრაობა-ერთიანი საქართველო — 1 554 ლარი;
  11. მოძრაობა-სახელმწიფო ხალხისთვის — 1 075 ლარი;

გახარიას პარტიის, საქართველოსთვის შემომწირველებს შორის 70 ფიზიკური პირი იყო. ამასთან, ლელო საქართველოს 10-მა ფიზიკურმა პირმა, ხოლო ენმ-ს 18-მა ფიზიკურმა პირმა შესწირა თანხა. გარდა ამისა, ენმ-ის სასარგებლოდ არაფულადი შემოწირულობა გაიღო ერთმა იურიდიულმა პირმაც.