საკოორდინაციო საბჭოს არჩევნების გადადების საკითხზე არ უმსჯელია. ამასთან დაკავშირებულ კითხვას საკოორდინაციო საბჭოსთან არსებული ოპერაციული შტაბის უფროსმა, გიორგი ღიბრაძემ ასე უპასუხა:

"მომავალში რა მსჯელობა იქნება, მაგის შესახებ ნამდვილად ვერ მოგახსენებთ, აღნიშნულ ეტაპზე მსგავსი საკითხი არ განუხილავს".

ჯანდაცვის მინისტრის მოადგილემ, თამარ გაბუნიამ განაცხადა, რომ მსგავს რეკომენდაციას არ გასცემენ, თუ ის უსაფრთხო არჩევნების ჩატარებისთვის დაწესებული წესები შესაბამისად აღსრულდება.

"ჩვენ ვფიქრობთ, რომ ყველა ის სუბიექტი, ვინც მონაწილეობას იღებს და ემზადება არჩევნებისთვის, დაიცავს იმ მოთხოვნებს, რაც დაწესებულია ამ მიზნებისთვის", — განაცხადა თამარ გაბუნიამ.

მისი ინფორმაციით, ჯანდაცვის სამინისტრო თანამშრომლობს ცენტრალურ საარჩევნო კომისიასთან და არჩევნებში ჩართული პირებისთვის ვაქცინაციისა და ტესტირების განსაკუთრებული რეჟიმი მოქმედებს.

რაც შეეხება დაავადებათა კონტროლის ეროვნული ცენტრის დირექტორს, ამირან გამყრელიძეს, მან ამ საკითხს "პოლიტიკური" უწოდა და აღნიშნა, რომ ამასთან დაკავშირებით მის რეკომენდაციებს საბჭოს წევრების შეხევდრებზე გააჟღერებს.

სახალხო დამცველი, ნინო ლომჯარია აცხადებს, რომ როცა ქვეყანაში დღიურად 60-70 ადამიანი იღუპება და მოქალაქეთა სათანადო რაოდენობა ვაქცინირებული არ არის, არ შეიძლება, "ყველაფერი იყოს ღია". მისი თქმით, ეპიდვითარების დასტაბილურებამდე, საჭიროა რეგულაციების გამკაცრება და არჩევნების გადადებაზე ფიქრი.

გაიგე მეტი: