ამერიკელი მსახიობისა და მომღერლის, დემი ლოვატოს თქმით, იგი საკუთარი იდენტობის შეცნობას განაგრძობს.

მუსიკოსმა, რომელმაც მაისში განაცხადა, რომ არაბინარული გენდერული იდენტობის მქონეა, ცოტა ხნის წინ საკუთარი თავის აღმოჩენის გამოცდილებასა და თავის მიერ დანახულ მომავალზე ისაუბრა.

"არაბინარული გენდერული იდენტობის მქონედ ყოფნა ნიშნავს, რომ მე ბევრად მეტი ვარ, ვიდრე კაცისა და ქალის ბინარული სისტემა", — ამბობს ლოვატო, — "და ჩვენ ვართ ბევრად მეტი, თუკი საკუთარ თავს გულში ჩახედვის შესაძლებლობას მივცემთ და კითხვის ნიშნის ქვეშ დავაყენებთ ბინარულ სისტემას, რომელშიც გავიზარდეთ".

მოგვიანებით, მომღერალმა დასძინა, რომ საკუთარ იდენტობაზე საუბრის დაწყებამდე ძალიან ნერვიულობდა, რადგან არ სურდა, ადამიანებს ეფიქრათ, რომ ეს შეუფერებელი ან არაგულწრფელი ნათქვამი იყო.

"უბრალოდ, მინდოდა, ხალხს დაენახა, რას ნიშნავს ქამინგ აუთი ჩემი გამოკეთების პროცესში".

ლოვატომ ასევე აღნიშნა, რომ თავის გენდერულ იდენტობასთან დაკავშირებული კითხვების დასმა ჯერ კიდევ დაწყებით სკოლაში დაიწყო, თუმცა, საკუთარი თავის შეცნობის პროცესი მუდამ გრძელდება.

"შეიძლება ისეთი დროც მოვიდეს, როცა ტრანსგენდერად ვიდენტიფიცირდები", — აღნიშნავს მომღერალი, — "შეიძლება მთელი ცხოვრება არაბინარული გენდერული იდენტობის მქონედ და გენდერულად არაკონფორმირებულ ადამიანად ვიდენტიფიცირდე. ან, შესაძლოა, ისეთი პერიოდი დადგეს, როცა ასაკი მომემატება და ქალად ვიდენტიფიცირდები".

მიუხედავად იმისა, რომ ლოვატოს თქმით, თავისი იდენტობის მომავალი ბუნდოვანია, იგი დასძენს, რომ ამჟამინდელ განსაზღვრებასთან თავს კომფორტულად გრძნობს.

"ეს ყველაფერი გახსნილობასა და თავისუფლებას უკავშირდება, მე კი ძალიან თავისუფალი პიროვნება ვარ, ამიტომ ეს ყველაფერი იმაშიც აისახება, თუ როგორ გამოვხატავ საკუთარ თავს", — დასძენს დემი.

აღსანიშნავია, რომ მომღერალი და მსახიობი წლების განმავლობაში იყო ლგბტქ უფლებების აქტიური მხარდამჭერი. დისნეის კიდევ ერთ ყოფილ ვარსკვლავთან, ნიკ ჯონასთან ერთად, მან დაგეგმილი ტურნეც კი გააუქმა ჩრდილოეთ კაროლინაში, როცა შტატში დისკრიმინაციული კანონი მიიღეს.

მარტის თვეში ლოვატომ ასევე განაცხადა, რომ იგი პანსექსუალია — რაც სექსუალური ორიენტაციაა და აღნიშნავს პიროვნებას, რომელსაც იზიდავს ნებისმიერი გენდერული იდენტობის მქონე ადამიანი.