თალიბანის მებრძოლებმა, რომლებიც გერმანული მედიის, Deutsche Welle-ს ჟურნალისტს ეძებდნენ, მისი ოჯახის ერთი წევრი მოკლეს, მეორე კი მძიმედ დაშავდა. DW-ს ინფორმაციით, ჟურნალისტი ამ დროისთვის გერმანიაშია. მისი სხვა ნათესავები თალიბანის სასტიკ რეჟიმს გაექცნენ და იძულებულნი არიან დაიმალონ.

DW-ს დირექტორმა, პიტერ ლიმბურგმა მომხდარი ფაქტი დაგმო და გერმანიის ხელისუფლებას მოქმედებისკენ მოუწოდა.

"გუშინ თალიბანის მიერ ჩვენი ერთ-ერთი რედაქტორის ახლო ნათესავის მკვლელობა წარმოუდგენლად ტრაგიკულია და მოწმობს იმ მწვავე საფრთხის შესახებ, რომელიც ჩვენს ყველა თანამშრომელს და მათ ოჯახის წევრებს ემუქრებათ ავღანეთში.

აშკარაა, რომ თალიბები უკვე აწარმოებენ ჟურნალისტების ორგანიზებულ ჩხრეკას, როგორც ქაბულში, ისე პროვინციებში. ჩვენ დრო გვეწურება", — განაცხადა ლიმბურგმა.

გამოცემის ინფორმაციით, თალიბანმა დაარბია DW-ს სულ მცირე სამი ჟურნალისტის სახლი. დაჯგუფების წევრები დევნიან, იტაცებენ და კლავენ სხვადასხვა მედიასაშუალებებში მომუშავე ჟურნალისტებს და მათ ოჯახის წევრებს.

სავარაუდოდ, თალიბანის წევრებმა გაიტაცეს კერძო ტელევიზიის, Ghargasht TV-ის ჟურნალისტი, ნემატულაჰ ჰემატი და დახვრიტეს რადიო Paktia Ghag-ის ხელმძღვანელი ტოოფან ომარი. ასევე, სავარაუდოდ თალიბების წარმომადგენელმა ორმა კაცმა, ორ აგვისტოს ჯალალაბადის ქუჩაში მოკლa გერმანული გაზეთის, Die Zeit-ის თანამშრომელი და მთარგმნელი ამდადულაჰ ჰამდარდი. ერთი თვის წინ კი, გარდაიცვალა მსოფლიოში ცნობილი ინდოელი ფოტოგრაფი და პულიცერის პრემიის ლაურეატი დანიელ სიდიკი, მისი მკვლელობაც თალიბანის პასუხისმგებლობაა.

გერმანიის ჟურნალისტთა ასოციაცია (DJV) ასევე მოუწოდებს გერმანიის მთავრობას, მიიღოს სწრაფი ზომები. გაერთიანების თავმჯდომარის თქმით, გერმანია არ უნდა იყოს უმოქმედოდ, როცა ჟურნალისტებს დევნიან და კლავენ. მისი თქმით, აუცილებელია ამ ჟურნალისტების გადარჩენა და გერმანიაში თავშესაფრის მიცემა.

თალიბანმა ხელისუფლების ყველა წარმომადგენლისათვის საყოველთაო "ამნისტია გამოაცხადა" და მთავრობაში ქალები მიიწვია. მათი თქმით, ხალხს შეუძლია, დაუბრუნდეს თავის რუტინულ ყოველდღიურობას. ამის მიუხედავად, ისინი დევნიან ქუჩაში დამოუკიდებლობის დღის აღსანიშნავად გამოსულ მოქალაქეებს, იმ ქალებს, რომლის ჩაცმის სტილიც არ მოსწონთ, ჟურნალისტებს და ახლა უკვე მათ ოჯახის წევრებსაც.