ნაციონალური მოძრაობის წევრმა ლევან ვარშალომიძემ ბრიფინგი გამართა, რომელზეც ბათუმის არეულობაში პასუხისმგებლობა საქართველოს ხელისუფლებას დააკისრა.

ვარშალომიძეს თქმით, პროტესტი საპატრულო პოლიციის მიმართ იმ კონკრტულ დღეს დაწერილი ჯარიმით არ დაწყებულა:

"ეს ჯარიმა იყო ბოლო წვეთი იმ კორუფციის, ნეპოტიზმისა და სოციალური ფონის, რომელიც ბოლო 5 წლის განმავლობაში ბათუმში ხდება".

ენმ-ს წევრის თქმით, ხელისუფლება არ დაელაპარაკა საზოგადოების იმ ნაწილს, რომლებიც მისი თქმით მშვიდობიანად აქციას მართავდნენ.

"იმის ნაცვლად, რომ დაპირებისამებრ გაეთავისუფლებია აქციის 6 მონაწილე, მან მშვიდობიანი აქტივისტები დაარბია, რის შემდეგაც აქციას შეემატა სუსის მიერ მართული ჯგუფი, რომელმაც ვანდალური აქტები ჩაიდინეს. ხელისუფლებამ მისი კანონიერი უფლება არ გამოიყენა დანაშაულისა და ვანდალიზმის წინააღმდეგ და მშვიდად უყურებდა ამ მოვლენებს".

ვარშალომიძე საქმის დაუყოვნებლივ გამოძიებას ითხოვს.

11 მარტს პატრულმა მოძრაობის შეფერხებისა და არასწორი პარკირებისთვის მოქალაქე დააჯარიმა, რასაც ჯერ სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა. აღნიშნული აქცია არეულობაში გადაიზარდა, რა დროსაც აქციის მონაწილეებმა დაწვეს და დააზიანეს როგორც ავტომობილები, ისე საგზაო ინფრასტრუქტურა.

შინაგან საქმეთა სამინისტრომ გამოძიება ორი მუხლით დაიწყო.