განათლების მინისტრის, მიხეილ ჩენკელის განცხადებით, სააკაშვილის ხელისუფლება სკოლებს ანგრევდა, ქართული ოცნების ხელისუფლება კი აშენებს. მისი მტკიცებით, მმართველი გუნდის უმთავრესი პრიორიტეტი განათლების ხარისხზე ზრუნვაა. ეს განცხადება ჩხენკელმა ქობულეთის მერობის კანდიდატის წარდგენისას გააკეთა.

"მინდა მთელი გულით, ბათუმს და მთელს აჭარას მივულოცო განათლების ქალაქის დაფუძნება, რომელიც სექტემბრიდან ახალ მოსწავლეებს მიიღებს და დაიწყება აკადემიური ცხოვრება. როგორც ბატონმა პრემიერმა აღნიშნა, ჩვენთვის უმთავრესი პრიორიტეტი არის განათლების ხარისხზე ზრუნვა, რაც მთლიანად არის ასახული 10 წლიან სტრატეგიულ გეგმაში, რომლის პრეზენტაციაც რამდენიმე დღის წინ გვქონდა.

მინდა განსაკუთრებით გავამახვილო ყურადღება, ახალი სკოლების მშენებლობაზე და არსებული სკოლების სრულ რეაბილიტაციაზე. როდესაც სააკაშვილის ხელისუფლების დროს სკოლებს ანგრევდნენ, მათგან განსხვავებით ჩვენი გუნდი სკოლებს აშენებს. აკეთებს არსებული სკოლების სრულ რეაბილიტაციას, მათი ევროპულ სტანდარტთან შესაბამისობაში მოყვანას. ამის მაგალითი მრავლად არის და ეს ტენდენცია, რა თქმა უნდა, გაგრძელდება, მათ შორის ქობულეთში", — თქვა მიხეილ ჩხენკელმა.