ევროკავშირი ვაქცინაციის პროცესის მხარდასაჭერად აღმოსავლეთ პარტნიორობის ქვეყნებისთვის კიდევ დამატებით 35 მილიონ ევროს გამოყოფს და დახმარება ჯამში, 75 მილიონი ევრო გახდება. ამის შესახებ ინფორმაცია ევროკომისიის ვებგვერდზე გამოქვეყნდა.

ინფორმაციის თანახმად, თანხა მოხმარდება ვაქცინაციის კამპანიის დაჩქარებას აღმოსავლეთ პარტნიორობის 6 ქვეყანაში — სომხეთში, აზერბაიჯანში, ბელარუსში, საქართველოში, მოლდოვასა და უკრაინაში.

"დამატებით 35 მილიონი ევროს მოცულობის დახმარების პაკეტით ევროკავშირის მიზანია გაზარდოს ვაქცინების ხელმისაწვდომობა აღმოსავლეთ პარნიორობის რეგიონში. აღნიშნული თანხა დაემატება თავდაპირველად გამოყოფილ 40 მილიონ ევროს, რომელიც თებერვალში იქნა გამოყოფილი და მიზნად ისახავდა ვაქცინაციისთვის მზაობის უზრუნველყოფას ლოკალურ დონეზე პოპულაციის უსაფრთხო და ეფექტიანი ვაქცინებით იმუნიზაციისთვის", — ნათქვამია განცხადებაში.

ევროკავშირმა ახალი ინიციატივის ფარგლებში, რომელიც ჯანმრთელობის მსოფლიო ორგანიზაციის ევროპის რეგიონული ოფისის მხარდაჭერით ხორციელდება, აღმოსავლეთ პარტნიორობის ექვს ქვეყანას, მათ შორის, საქართველოს ვაქცინაციის პროცესის ხელშესაწყობად 40 მილიონი ევრო თებერვალში გამოუყო.