თალიბანმა ბოლო ორ დღეში ორი პროვინციის დედაქალაქი აიღო — 6 აგვისტოს ნიმროზის პროვინციის დედაქალაქი, ზარანჯი და 7 აგვისტოს ჯუზჯანის პროვინციის დედაქალაქი შებერღანი.

ზარანჯი ავღანეთის მთავრობისთვის დიდი ეკონომიკური მნიშვნელობის ქალაქი იყო. ზარანჯის აღების გარდა, თალიბანმა ქაბულში მდებარე ავღანეთის მთავრობის საინფორმაციო და მედიაცენტრის დირექტორის, დავა ხანის მკვლელობაზე და ავღანეთის საჰაერო ძალების პილოტის, ჰამიდულლაჰ აზიმის, აფეთქებაზე აიღო პასუხისმგებლობა. გარდა ამისა, თალიბანი აგრძელებს მასშტაბურ საბრძოლო ოპერაციებს რამდენიმე ქალაქის, მათ შორის ჰაერათის გარშემო, ასევე პროვიციებში ყანდაარსა და ლაშქარ გაჰში.

ფოტო: Reuters

6 აგვისტოს თალიბანმა ავღანეთ-პაკისტანის საზღვარზე მთავარი გამშვები პუნქტი ჩაკეტა და გამოაცხადეს, რომ არავის გადაუშვებენ მეორე მხარეს მანამ, სანამ ისლამაბადი ავღანელებისთვის ვიზის ვალდებულებებს არ გააუქმებს, ან შეამსუბუქებს. გამშვებ პუნქტზე გამავალი გზა ავღანეთისთვის ზღვაზე გასასვლელი მნიშვნელოვანი წერტილია. პაკისტანმა კი საზღვარი მას შემდეგ ჩაკეტა, რაც ივლისში თალიბანმა პაკისტანის საზღვრის მიმდებარე რაიონები გასულ თვეში დაიკავა.

ფოტო: AP

ავთანეთში ძალადობა მას შემდეგ გაიზარდა, რაც აშშ-მა და სხვა საერთაშორისო ძალებმა 20-წლიანი სამხედრო ოპერაციების შემდეგ, 1 მაისიდან ქვეყნიდან ჯარების გაყვანა დაიწყეს. აშშ-ის პრეზიდენტის გადაწყვეტილებით, ამერიკის მისია ავღანეთში დაგეგმილზე ადრე, 31 აგვისტოს, დასრულდება. აშშ-მ მთავარი სტრატეგიული წერტილი — ბაგრამის ავიაბაზა, უკვე დატოვა. ავღანეთში ამერიკელ სამხედროთა მხოლოდ მცირე ჯგუფი რჩება და ისინი საელჩოს დაიცავენ. ივნისის ბოლოს The Wall Street Journal-მა აშშ-ის დაზვერვის სამსახურთან დაახლოებული პირების ინფორმაციაზე დაყრდნობით გაავრცელა, რომ დაზვერვის სამსახურის დასკვნით, რომელიც ჯერ ოფიციალურად არ გამოქვეყნებულა, აშშ-ის ძალების მიერ ავღანეთის დატოვებიდან 6 თვეში შესაძლოა, ქაბულის მთავრობა დაეცეს.

ფოტო: The Guardian

გაიგეთ მეტი: