საბერძნეთში რამდენიმე დღეა, ძლიერ ხანძრებს ებრძვიან. BBC-ის ინფორმაციით, დაიღუპა 2 ადამიანი, მათ შორის ერთ-ერთი მეხანძრე-მაშველია და დაშავებულია 20-ზე მეტი. ქვეყანაში 150-ზე მეტი ხანძრის კერაა. 6 რეგიონში განგაშის მაღალი დონეა გამოცხადებული.

The Guardian-ის ინფორმაციით, ქვეყანაში ცეცხლის კერების გავრცელება უკონტროლო ხდება. სტიქიის ზონებიდან მოსახლეობის ევაკუაცია ამ წუთებშიც მიმდინარეობს.

ხანძრის ჩასაქრობად ათასზე მეტი მეხანძრე და 20 თვითმფრინავია მობილიზებული. დამატებით ტექნიკასა და მეხანძრეებს საბერძნეთს სხვადასხვა ქვეყნები უგზავნიან. სტიქიისგან შექმნილი გარემოპირობების გამო, თესალონიკში ტბებსა და მდინარეებში თევზები უჟანგბადობით დაიხოცნენ. ბერძნული მედიის ცნობით კი, ხანძრის განზრახ გაჩენის ბრალდებით, 2 პირი დააკავეს.

ფოტო: The Guardian

ხანძარი მძვინვარებს ასევე კუნძულ ევიაზე და ძველ ოლიმპიასთან ახლოს, ოლიმპიური თამაშების სამშობლოში.

ფოტო: Reuters

ცეცხლის გავრცელებას უჩვეულოდ ძლიერი ქარი და მაღალი ტემპერატურა უწყობს ხელს. ბოლო ერთი კვირის განმავლობაში საბერძნეთში ჰაერის ტემპერატურა 40 გრადუსზე მეტი იყო. განსაკუთრებით მძიმე მდგომარეობაა დედაქალაქ ათენის ჩრდილოეთით.

ფოტო: EPA