ფულით, შესაძლოა, ბედნიერებას ვერ იყიდი, თუმცა, მისი დაკარგვის შემთხვევაში უბედურებას ნამდვილად იგემებ, განსაკუთრებით, თუკი მიზეზი შენი დაუდევრობაა. სწორედ ასე მოუვიდა ოჰაიოში მცხოვრებ ოჯახს, რომელმაც ბებიის სახლის დალაგებისას $25 ათასს, ნაღდი ფულის სახით, არც მეტი, არც ნაკლები, ნაგავში ჩაუძახა.

მათდა ბედად, დასუფთავების ადგილობრივმა სამსახურმა გადაყრილ "ნაგავს" მალევე მიაგნო.

"ბებიის სახლს ალაგებდნენ, როცა მაცივრის გამოსუფთავება გადაწყვიტეს, საყინულეში შენახული ყველაფერი გადმოაპირქვავეს და პარკში ჩაყარეს", — ამბობს სამსახურის თანამშრომელი, გერი კეპენი, — "მერე კი, ბებიამ უთხრა, მანდ კონვერტში მოთავსებული $25 ათასია და არ დაკარგოთო".

საგანგაშო ამბის შეტყობისთანავე ოჯახმა დასუფთავების სამსახურში დარეკა, კეპენი და მისი თანამშრომლები კი მაშინვე გამოეშურნენ, რათა ნარჩენების გადამტან მანქანას დასწეოდნენ. მათი თქმით, ფულის პოვნა შეუძლებელი იქნებოდა, მანქანა რომ ნაგავსაყრელზე მისვლამდე არ გაეჩერებინათ, რადგან ნარჩენების ჩამოცლისთანავე ბულდოზერი მათ აბრტყელებს და ზემოდან მიწას აყრის.

თუმცა, ფულის პოვნას მაინც უამრავი ადამიანი დასჭირდა. ხუმრობა ხომ არ არის ნარჩენების 6-ტონიან გროვაში მომცრო პარკის პოვნა?!

"დაახლოებით, 10 წუთი დაგვჭირდა, მერე კი მე შეკვრა შევნიშნე და როცა გადმოვიღეთ, შიგ ფული აღმოჩნდა", — ამბობს კეპენი, — "ისე გაუხარდათ, ბედნიერებისგან ტიროდნენ".

მართალია, ამ ამბავს კეთილი დასასრული აქვს, თუმცა, მსგავსი შემთხვევები ყოველთვის ასე არ მთავრდება ხოლმე.

იანვარში ბრიტანეთის მოქალაქემ მოხალისეებს $70 მილიონი შესთავაზა, რათა ნაგავსაყრელზე წასულიყვნენ და მყარი დისკი მოეძებნათ, რომელიც მან 2013 წელს გადააგდო. კაცის თქმით, დისკზე 7 500 ბიტკოინი იყო, ამ რაოდენობის კრიპტოვალუტის ღირებულება კი, დაახლოებით, $280 მილიონს უდრიდა.

ასევე იხილეთ: