რამდენიმე დღის წინ გამოცემა Instyle-თან ახალ ინტერვიუში ჯენიფერ ენისტონმა მკითხველებს გაუმხილა, რომ რამდენიმე მეგობართან ურთიერთობა გაწყვიტა. ამის მიზეზი კი ის გახდა, რომ აღნიშნული ადამიანების ნაწილს ვაქცინის გაკეთება არ სურდა, მეორე ნაწილს კი იმის გამხელა, იყო თუ არა აცრილი.

"ეს რთულია, რადგან ყველას აქვს უფლება ჰქონდეს საკუთარი აზრი, თუმცა ბევრი აზრი მხოლოდ შიშსა და პროპაგანდას ეფუძნება", — ამბობს ჯენიფერი.

როგორც ჩანს, ჯენიფერის გადაწყვეტილებამ საზოგადოების ნაწილის უკმაყოფილება გამოიწვია. ჯენიფერმა უკმაყოფილების გამომხატველი კომენტარების გამო ინსტაგრამზე წუხილი გამოხატა, შემდეგ კი ინსტაგრამ სთორიში ერთ-ერთ კომენტარს უპასუხა.

"თუ თავად [ჯენიფერი] აცრილია, გამოდის, დაცულია, არა?! მაშინ რატომ ღელავს მის ირგვლივ აუცრელ ადამიანებზე?" — წერს ერთ-ერთი მომხმარებელი.

"იმიტომ, რომ თუ შენ რომელიმე შტამით ხარ დაინფიცირებული, მაინც შეგიძლია, მეც დამაინფიცირო. შესაძლოა, მე მსუბუქი ფორმა მქონდეს და არც საავადმყოფოში დამაწვინონ და არც მოვკვდე, თუმცა შეიძლება, რომ ისეთ ადამიანს გადავდო, რომელიც ვაქცინირებული და იმუნური არაა (ან მანამდე ჯანმრთელობის პრობლემები აღენიშნებოდა). შესაბამისად, მე ამ ადამიანების სიცოცხლეს საფრთხეს შევუქმნი. სწორედ ამიტომ ვღელავ", — პასუხობს ჯენიფერი კრიტიკულ კომენტარებს.

ფოტო: Jennifer

ჯენიფერ ენისტონი საზოგადოებას კორონავირუსთან დაკავშირებული საფრთხეების შესახებ ინსტაგრამზე ხშირად ახსენებს.

"უბრალოდ იფიქრეთ იმ ადამიანებზე, რომლებმაც ეს საშინელი ვირუსი უკვე გადაიტანეს. გააკეთეთ ეს თქვენი ოჯახისთვის და, უპირველეს ყოვლისა, საკუთარი თავისთვის. კოვიდი ნებისმიერი ასაკის ადამიანს შეიძლება დაემართოს", — წერს ერთ-ერთ პოსტში მსახიობი.

ამავე თემაზე: