ლუკა სირაძის საქმეზე ბრალდებული მარიანა ჩოლოიანის გათავისუფლებასთან დაკავშირებით საქართველოს ახალგაზრდა იურისტთა ასოციაცია აცხადებს, რომ ეს არის პირდაპირი წაქეზება ნებისმიერი იმ დანაშაულისა, რომელიც შეიძლება ჩაიდინონ სამართალდამცავებმა.

"მე შემიძლია გითხრათ, რომ ჩვენ ძალიან აღშფოთებულები და გაბრაზებულები ვართ იმ გადაწყვეტილებით, რომელიც ჩვენ ვნახეთ მარიანა ჩოლოიანთან დაკავშირებით და მორიგ უსამართლობასთან მიმართებით, რომელიც ლუკა სირაძის საქმეში მოხდა. ეს არის არა უბრალოდ ამ საქმესთან დაკავშირებით მიღებული უსამართლო გადაწყვეტილება, არამედ შეგვიძლია ვთქვათ, ეს არის პირდაპირი წაქეზება ნებისმიერი იმ დანაშაულისა, რომელიც შეიძლება სამართალდამცავებმა ჩაიდინონ ნებისმიერი ჩვენგანის მიმართ და ისინი უბრალოდ დაუსჯელები დარჩნენ", — ამბობენ საიაში.

მათივე თქმით, ლუკა სირაძის საქმეზე მხოლოდ ერთადერთი ადამიანი დააკავეს, სხვა ნაწილებთან მიმართებით კი გამოძიება არაეფექტური იყო.

"სახელმწიფომ ფაქტობრივად ერთადერთ ადამიანზე გადატეხა ჯოხი და დაკავებული იყო მხოლოდ მარიანა ჩოლოაინი და სხვა არავინ. ჩვენ ვნახეთ, რომ სხვა ნაწილთან მიმართებით გამოძიება უბრალოდ არაეფექტური იყო და ეს საქმე არ იყო გამოძიებული სრულყოფილად. დააკავეს მხოლოდ 1 ადამიანი ჩვენების იძულებით მიცემის ბრალდებით. მას მიუსაჯეს 3 წლით თავისუფლების აღკვეთა, რასაც ჩვენც და ოჯახიც, რა თქმა უნდა, ვაპროტესტებდით და ვფიქრობდით, რომ ეს არ იყო სამართლიანი და სათანადო სასჯელი", — ამბობს ნიკა სიმონიშვილი.

საიას თავმჯდომარის განცხადებით, კომისია არ დაინტერესებულა ლუკა სირაძის ოჯახის პოზიციით და ეს ყველაფერი მიანიშნებს იმაზე, რომ ქვეყანაში სამართლიანი გამოძიება არ გვაქვს.

"როგორც წესი, სასამართლო პირდაპირ არ იღებს გადაწყვეტილებას გათავისუფლებასთან დაკავშირებით და უდოს შეეძლო მიეღო სხვაგვარი გადაწყვეტილება. კომისია არ დაინტერესებულა ლუკა სირაძის ოჯახის პოზიციით და ეს ყველაფერი ერთადერთ რამეზე მიგვანიშნებს, რომ ქვეყანაში არ გვაქვს სამართლიანი გამოძიება, ქვეყანაში არ გვაქვს სამართლიანი სასამართლო და რა თქმა უნდა, სასამართლო არის პირდაპირ ლოიალური ხელისუფლების მიმართ", — ამბობს სიმონიშვილი.

15 წლის ლუკა სირაძის თვითმკვლელობის საქმეზე ჩვენების მიცემის იძულებაზე დაკავებული გამომძიებელი, მარიანა ჩოლოიანი გაათავისუფლეს.

ჩოლოიანს ჩვენების მიცემის იძულების ბრალდებით 2020 წლის სექტემბერში 3 წლით თავისუფლების აღკვეთა მიუსაჯეს.

15 წლის ბიჭი, რომელიც დაკითხვის შემდეგ კორპუსიდან გადმოხტა გასული წლის 2019 წლის 17 დეკემბერს გარდაიცვალა. ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

პოლიციას გამოძიების დაწყების მოთხოვნით მწვანე სკოლამ მიმართა, რომლის ტერიტორიაზეც გვიან ღამით არასრულწლოვანმა სხვადასხვა წარწერები დატოვა. გავრცელებული ინფორმაციით, ეს 15 წლის ლუკა სირაძემ გააკეთა, რომელიც მწვანე სკოლის ყოფილი მოსწავლე იყო.

საიას ინფორმაციით, დაკითხვაზე ლუკა სირაძე ყოფილ თანაკლასელს დააპირისპირეს და მასზე ფსიქოლოგიურად იძალადეს, რის შემდეგაც ის მეცხრე სართულიდან გადმოხტა. რამდენიმე დღის განმავლობაში ის კომატოზურ მდგომარეობაში იყო.

შინაგან საქმეთა სამინისტრო ამტკიცებდა, რომ ბავშვი მშობელთან ერთად გამოკითხეს და ფსიქოლოგიური ძალადობას ადგილი არ ჰქონია. მათ გამოძიება თვითმკვლელობამდე მიყვანის მუხლით დაიწყეს. გამოძიებას სწორედ ის განყოფილება აწარმოებს, სადაც არასრულწლოვანზე, სავარაუდოდ, ფსიქოლოგიურად იძალადეს.

სახელმწიფო ინსპექტორის აპარატმა კი გამოძიება სისხლის სამართლის კოდექსის 335-ე მუხლით დაიწყო, რაც ჩვენების მიცემის იძულებას გულისხმობს. მოზარდის გარდაცვალების შემდეგ ამ საქმეზე გამომძიებელი მარიანა ჩოლოიანი დააკავეს და 2 სამართალდამცავს უფლებამოსილება დროებით შეუჩერეს.

ვინ არის მარიანა ჩოლოიანი

საქართველოს ახალგაზრდა იურისტთა ასოციაციის ინფორმაციით, მარიანა ჩოლოიანი ფიგურირებს 2011 წლის 26 მაისს ე.წ. ყინწვისის სპეცოპერაციის დროს დაკავებული ნიკოლოზ გოგუაძის საქმეში.

ორგანიზაციის განცხადებით, გოგუაძე 2011 წლის 26 მაისს, ე. წ. ყინწვისის სპეცოპერაციის დროს, ყინწვისის სამონასტრო კომპლექსის მიმდებარე ტერიტორიაზე დააკავეს. როგორც საიაში ამბობენ, დასჯისა და აღიარებითი ჩვენების მოპოვებისთვის გოგუაძეზე იყო როგორც ფიზიკური, ისე ფსიქოლოგიური ძალადობა.

ორგანიზაციის განცხადებით, ჩოლოიანმა სასამართლოში ძალადობა უარყო. ამავე დროს, კი 2019 წელს ადამიანის უფლებათა ევროპულმა სასამართლომ არასათანადო მოპყრობა დადგენილად მიიჩნია.