პარტიის, გირჩი — მეტი თავისუფლება თავმჯდომარე, ზურაბ ჯაფარიძე აცხადებს, რომ პრეზიდენტის შეფასება მიშელის დოკუმენტის ანულირებაზე რბილი და "ზედმეტად დიპლომატიური" იყო. ჯაფარიძე ამბობს, რომ სალომე ზურაბიშვილის განცხადებები არ იყო იმ რეალობის ადეკვატური, რომელშიც ვცხოვრობთ.

"მოვისმინე შეფასება, მაგრამ, ჩემი აზრით, იყო რბილი და ზედმეტად დიპლომატიური ენა. ეს არ იყო ის შეფასება, რომელიც იქნებოდა შესაბამისი იმ რეალობის, რა რეალობაშიც ახლა არის ქვეყანა და იმ საქციელის, რა საქციელიც ჩაიდინა ქართულმა ოცნებამ", — განაცხადა ზურაბ ჯაფარიძემ.

მას შემდეგ, რაც სალომე ზურაბიშვილი მიშელის შეთანხმების ხელმომწერი პოლიტიკოსების ნაწილს შეხვდა, გუშინ, 3 აგვისტოს სპეციალური ბრიფინგი გამართა და განაცხადა, რომ ვერ აიღებს პასუხისმგებლობას ვერც დოკუმენტის ცალკეულ ელემენტებზე და ვერც მის ანულირებაზე. ზურაბიშვილმა, ასევე, აღნიშნა, რომ არ ეთანხმება ქართული ოცნების არგუმენტებს, რითაც ხსნიან დოკუმენტის ანულირება. პრეზიდენტმა განაცხადა, რომ როცა უცხოეთისგან პატივისცემას ვითხოვთ, თავადაც უნდა ვიმსახურებდეთ პატივისცემას, ამისთვის კი ნაკისრ ვალდებულებებს უნდა ვასრულებდეთ.

აღსანიშნავია, რომ თავად ზურაბ ჯაფარიძე პრეზიდენტთან სასაუბროდ არ მივიდა. მან განაცხადა, რომ შეხვედრას მხოლოდ იმ შემთხვევაში დასთანხმდებოდა, თუ პრეზიდენტი საჯაროდ შეაფასებდა ქართული ოცნების მიერ მიშელის დოკუმენტის ანულირებას. პრეზიდენტთან შეხვედრაზე იგივე არგუმენტით თქვა უარი სტრატეგია აღმაშენებლის ლიდერმა, გიორგი ვაშაძემაც. მეტიც, ვაშაძემ განაცხადა, რომ პრეზიდენტისგან ქართული ოცნების საჯარო კრიტიკას ელოდება.

გაიგე მეტი: