დაავადებათა კონტროლის ეროვნული ცენტრის ხელმძღვანელის ინფორმაციით, წელს კორონავირუსით გარდაცვლილთა შორის 99,7% აუცრელი იყო. ამირან გამყრელიძის განცხადებით, მონაცემების გაანალიზებამ აჩვენა, რომ აცრილებში ძალიან დაბალია ინფიცირების მაჩვენებელი.

კერძოდ, როგორც გამყრელიძე განმარტავს, აცრა, დაახლოებით, 15-ჯერადობით იცავს. რაც ნიშნავს, რომ 1000 ადამიანში, ვინც აცრილია, შესაძლოა, დაიღუპოს 1 ადამიანი მაშინ, როცა 1000 აუცრელ ადამიანში დაღუპვის ალბათობა არის 15.

"გუშინ მთლიანად გაანალიზდა წელს გარდაცვლილთა რაოდენობა და 99,7% სამწუხაროდ აუცრელია. მეორე მხრივ, გაანალიზდა ასევე აცრილ მოსახლეობაში დაინფიცირების მაჩვენებელი და ეს არის, დაახლოებით, 0,3% ორჯერ აცრილებში და 0,9% — ერთხელ აცრილებში და აქაც სრულად აცრილებში, დაახლოებით, 15-ჯერადი განსხვავებაა", — ამბობს ამირან გამყრელიძე.

მისივე თქმით, აცრას აქვს ძალიან სერიოზული საფუძველი და ამიტომ აცრა არის ერთ-ერთი მთავარი, რაც დღეს მოსახლეობას დაიცავს ეპიდემიის შემდგომი გაუარესებისა და სავალალო შედეგისგან.

3 აგვისტოს მონაცემებით, ბოლო 24 საათში დადასტურდა კორონავირუსის 4 827 ახალი შემთხვევა და გარდაიცვალა 34 ადამიანი, რაც წელს ანტირეკორდია და მიაუხლოვდა შარშანდელ ყველაზე მაღალ მაჩვენებელს, როდესაც 2020 წლის ნოემბრის ბოლოს ქვეყანაში, ეპიდსიტუაციის გამო, მკაცრი შეზღუდვები დაწესდა. რაც შეეხება აცრის მაჩვენებელს, დღეის მდგომარეობით, სულ აცრილია 523 466 ადამიანი, მათ შორის ორჯერადად — 165 ათასი ადამიანი.