ჯანდაცვის მინისტრის, ეკატერინე ტიკარაძის თქმით, ანტივაქსერი რომ იყოს, ქვეყნის მოსახლეობას 4 ყველაზე მაღალი ხარისხის ვაქცინა ხელმისაწვდომი არ ექნებოდა. ამით ის მედიაში გავრცელებულ მის განცხადებას გამოეხმაურა და აღნიშნა, რომ მისი კომენტარი ინტერპრეტირებული იყო.

"მინდა ვისარგებლო შემთხვევით და გავაკეთო კომენტარი დღეს დილით მედიაში გავრცელებული დეზინფორმაციის შესახებ, სადაც მე ვარ მოხსენიებული, როგორც ანტივაქსერი, ვინაიდან ჩემი კომენტარი იყო ინტერპრეტირებული. ალბათ, არც პირველი აიცრებოდა მინისტრი, რომ იყოს ის ანტივაქსერი და არც იმ შემთხვევაში, როდესაც მინისტრი არის ანტივაქსერი, ქვეყნის მოსახლეობას არ ექნებოდა ხელმისაწვდომი 4 ყველაზე მაღალი ხარისხის ვაქცინა.

ძალიან გთხოვთ ყველას დავასრულოთ განზრახ მიმართული ანტი-პიარი ყველა წარმატებულ ღონისძიებაზე, რომელსაც ჯანდაცვის სამინისტრო ახორციელებს. ეს მოქმედებს ჩვენი მოსახლეობის განწყობაზე და დღეს, პანდემიის პირობებში ნამდვილად არ არის იმის დრო, რომ ავყვეთ პროვოკაციებს და შესაბამისად, მოვახდინოთ მოსახლეობის დეზინფორმაცია", — განაცხადა ტიკარაძემ.

ჯანდაცვის მინისტრმა დღეს, 28 ივლისს თქვა, რომ პანდემიასთან ბრძოლის მთავარი ინსტრუმენტი მოსახლეობის თვითორგანიზება, ნიღბის ტარება და სოციალური დისტანციაა. ტიკარაძის თქმით, იმუნიზაცია ამ ბრძოლაში მხოლოდ "დამატებითი ბენეფიტია".