მოძრაობა დროას დამფუძნებელი, ელენე ხოშტარია ამბობს, რომ ოპოზიციის წარმომადგენლების გაერთიანება შერწყმა არ არის და ისინი ერთმანეთს ურთიერთკონტროლის პრინციპს სთავაზობენ.

"ჩვენ საკრებულოში ყველა ცალ-ცალკე სიით გავდივართ, ჩვენი გაერთიანება არ არის შერწყმა, არავითარ შემთხვევაში არ არის შერწყმა იმიტომ, რომ ეს იქნებოდა, ჯერ ერთი, მოტყუება საზოგადოების და სამომავლოდ იქნებოდა საშიში, რადგან ერთი ძალა ძალაუფლებაში არ გვჭირდება, გვინახავს ყველა კარგი მმართველობის პირობებშიც კი მონოლითურმა ძალაუფლებამ გააფუჭა ამ ქვეყანაში საქმე და ბევრი შეცდომა დაუშვა, ამიტომ პრინციპულად ჩვენ არ ვერწყმებით ერთმანეთს, ურთიერთკონტროლის პრინციპს ვთავაზობთ ერთმანეთს", — განაცხადა ხოშტარიამ ფორმულას ეთერში.

ამ დროისთვის ოფიციალურად მერობის სურვილი გაცხადებული აქვთ კახა კალაძესა და ნიკა მელიას. ამასთან, ცნობილია, რომ მელიას მხარს უჭერს ოპოზიციის ნაწილიც. კერძოდ, ევროპული საქართველო, დროა და გირჩი — მეტი თავისუფლება. ამასთან, საკრებულოს თავმჯდომარეობის კანდიდატი ელენე ხოშტარიაა, ხოლო ვიცე-მერობის — გირჩის წარმომადგენელი. ცნობილია ისიც, რომ ენმ თბილისში მაჟორიტარობის კანდიდატებს საერთოდ არ დააყენებს, ხოლო მინიმუმ სამი ადგილი ექნება გირჩს. ამასთან დაკავშირებით ოპოზიციაში მოლაპარაკებები გრძელდება. ამ დროისთვის უცნობია ლელოს პოზიცია, სტრატეგია აღმაშენებელი კი "მესამე ძალაზე" საუბრობს და თბილისში საკუთარი კანდიდატი ეყოლება. რაც შეეხება ქართულ ოცნებას, უკვე ცნობილია, რომ თბილისის მერობა მეორედ სურს კახა კალაძეს.