თბილისის მერობის კანდიდატი, ნიკა მელია ქალაქში ჰომოფობიური პლაკატების გავრცელებას ეხმაურება და აცხადებს, რომ თბილისში სიძულვილის და ზიზღის ადგილი აღარ უნდა იყოს.

"ეს ქალაქი არის და უნდა იყოს ყველასი, გარდა სიძულვილისა. ამ ქალაქში სიძულვილის და ზიზღის ადგილი აღარ უნდა იყოს. ჩვენ უნდა გავაცნობიეროთ, რომ ჩვენი შვილები, ჩემი შვილი, რომელიც წელს სკოლაში მიდის, კახი კალაძის შვილები და სხვები ერთად უნდა ცხოვრობდნენ და ერთად მოუწევთ მათ ამ ქალაქში ცხოვრება, ერთ უნივერსიტეტებში, საერთო სკოლებში, სპორტულ დარბაზებში მოუწევთ სიარული და ვარჯიში. აქედან უნდა ამოვიდეთ და ჩვენი ფიქრი მხოლოდ ამ მიდგომას უნდა დავუქვემდებაროთ. ჩვენი ფიქრი უნდა იყოს მიმართული მომავლისკენ და მხოლოდ აქედან გამომდინარე უნდა ითქვას სიტყვაც კი, არათუ ქმედება", — თქვა მელიამ.

ამასთან, ნიკა მელია აღნიშნავს, რომ მიამიტობა იქნება იმის თქმა, თითქოს ეს პლაკატები ვინმეს გაუკვირდა და ძალიან ბევრი მიზეზია, რატომაც "გაკვირვებისთვის სივრცე აღარ დაგვიტოვეს". მან ეს მიზეზებიც ჩამოთვალა და მათ შორის თქვა ისიც, რომ ხელისუფლებაში ყოფნის პერიოდში ქართული ოცნების ხელწერა ძალადობა, ზიზღი, შუღლის გაღვივება და ბოღმის ნთხევაა. მელია აღნიშნავს, რომ "ამ ზიზღის ფრქვევის კამპანიის ავანგარდში" დგანან მაღალი თანამდებობის პირები.

"ჩვენ ვიმსახურებთ თბილისს, სადაც სიძულვილი არ ჭარბობს პატივისცემას. ჩვენ ვიმსახურებთ ისეთ თბილისს, სადაც არ არის შურისძიება და მიტევებაა დომინანტი, ვიმსახურებთ, 2021 წელია", — განაცხადა მელიამ

დღეს, 24 ივლისს, თბილისის ქუჩებში კვლავ გამოჩნდა ბანერები წარწერით: "არა ნაცებს, არა ბოროტებას", თუმცა ამჯერად ჰომოფობიური შინაარსით. წინა შემთხვევებისგან განსხვავებით, ამჯერად ბანერზე გამოსახულია არა მხოლოდ რომელიმე პოლიტიკური ლიდერი, არამედ კრიტიკული ტელევიზიების ხელმძღვანელები, ასევე, თბილისი პრაიდის დამფუძნებელი გიორგი თაბაგარი და სირცხვილიას აქტივისტი, გიგა მაქარაშვილი. გარდა ამისა, პლაკატზე არის ცისარტყელაც.

დამკვეთი ოფიციალურად უცნობია, თუმცა პლაკატებზე გამოსახულ ადამიანებს ეჭვი აქვთ, რომ ეს ქართულმა ოცნებამ გააკეთა. On.ge ამ საკითხზე მმართველ პარტიას დაუკავშირდა, სადაც ამას უარყოფენ და აცხადებენ, რომ არაფერ შუაში არიან.

აღსანიშნავია, რომ ფასადებზე, მათ შორის დროებით რკინის კედლებზე პლაკატების გაკვრისთვის არაერთხელ დაუჯარიმებიათ აქტივისტები. On.ge თბილისის მერიას დაუკავშირდა, სადაც ამბობენ, რომ მზად არიან კანონის შესაბამისად იმოქმედონ და დააჯარიმონ ის ადამიანები, ვინც ფასადებზე პლაკატები გააკრა. თუმცა უწყების ინფორმაციით, მათი ვინაობა შსს-მ უნდა დაადგინოს.

მოგვიანებით თბილისის მერიამ განცხადება გაავრცელა. უწყების თქმით, "ვრცელდება ინფორმაცია", რომ დედაქალაქის სხვადასხვა ქუჩაზე მოქალაქეთა ჯგუფმა თვითნებურად გააკრა პლაკატები და დაამახინჯა ქალაქის იერსახე. მერიაში ამბობენ, რომ ეს უკანონო ქმედებაა.

"აღნიშნული პლაკატების ჩამოხსნას უზრუნველყოფს თბილსერვის ჯგუფი, ხოლო რაც შეეხება კანონდამრღვევთა დაჯარიმებას, თბილისის მერიის მუნიციპალური ინსპექცია იმოქმედებს კანონის ფარგლებში", — აცხადებენ მერიაში.

On.ge დაუკავშირდა შინაგან საქმეთა სამინისტროსაც, საიდანაც პასუხს ველოდებით და მიღებისთანავე შემოგთავაზებთ.

წარწერა: "არა ნაცებს, არა ბოროტებას" თბილისში პირველად 2018 წლის ნოემბერში, საპრეზიდენტო არჩევნების წინ გამოჩნდა. მაშინ სარეკლამო ბილბორდზე ნაციონალური მოძრაობის ყოფილი და მოქმედი ლიდერების ფოტოები იყო გამოსახული, წარწერაზე კი სისხლი ჩანდა. ამ თემაზე საუბრისას ქართულ ოცნებაში ამბობდნენ, რომ ბილბორდი მათი დაკვეთით არ გაკეთებულა და კერძო ინიციატივაა, თუმცა ამის თაობაზე ინფორმირებული იყვნენ.

რამდენიმე დღეში ბილბორდებზე გამოჩნდა ახალი ფოტო, სადაც ენმ-ის საპრეზიდენტო კანდიდატის, გრიგოლ ვაშაძის სახეების უკან ყოფილი მაღალჩინოსნების სახეები იყო შესაბამისი წარწერებით: "ირჩევ ვაშაძეს, იღებ სააკაშვილს!", "ირჩევ ვაშაძეს, იღებ ახალაიას!", "ირჩევ ვაშაძეს, იღებ ქარდავას!", "ირჩევ ვაშაძეს, იღებ ვაშაძეს!".

მას შემდეგ, რაც 5 ივლისს ძალადობრივი და ჰომოფობიური ჯგუფები მედიას ფიზიკურად გაუსწორდნენ, თავს დაესხნენ რამდენიმე მოქალაქეს და დაარბიეს ორგანიზაციების ოფისები, სახელმწიფომ კი მათ დასაცავად ფაქტობრივად არაფერი გააკეთა, არაერთი აქცია გაიმართა. საპროტესტო ღონისძიებებს გეგმავენ მედიის წარმომადგენლებიც. 11 ივლისს გარდაიცვალა TV პირველის ოპერატორი, ლექსო ლაშქარავა, რომელსაც ძალადობრივმა ჯგუფებმა 5 ივლისს, სირცხვილიას ოფისის დარბევის მცდელობისას სცემეს. აქციები ამის შემდეგ უფრო აქტიური გახდა. მედია ითხოვს პრემიერმინისტრმა ირაკლი ღარიბაშვილმა მომხდარის გამო პოლიტიკური პასუხისმგებლობა აიღოს. ძალადობის ორგანიზატორები ამ დრომდე არ დაუკავებიათ, ღარიბაშვილი კი ჰომოფობიურ განცხადებებს აკეთებს.