პარლამენტმა 2021 წლის ბიუჯეტში შესატან ცვლილებებს მხარი დაუჭირა. ბიუჯეტის კორექტირებული ვარიანტი ეკონომიკური ზრდის 7,7%-იან პროგნოზზეა აგებული. აქამდე საქართველოს მთავრობის ეკონომიკური ზრდის მოლოდინი 3,4% იყო.

შედარებით მაღალი ეკონომიკური ზრდის მოლოდინის შესაბამისად, მთავრობა შემოსულობების ზრდასაც ელოდება, რის მიხევითაც შეცვლილია ბიუჯეტის ხარჯების მონაცემები.

ფინანსთა მინისტრის პირველი მოადგილის, გიორგი კაკაურიძის განცხადებით, ბიუჯეტის გაზრდის სამი ძირითადი მიზანი იყო:

• ბიუჯეტის დეფიციტის შემცირება;
• ეკონომიკური აღდგენის ხელშეწყობა;
• COVID-19-ის მართვა და მასთან დაკავშირებული ჯანმრთელობის დაცვის ღონისძიებები;

რა იცვლება კორექტირებული ბიუჯეტის მიხედვით

პარლამენტის მიერ დამტკიცებულ 2021 წლის სახელმწიფო ბიუჯეტის გადამუშავებულ ვარიანტში რამდენიმე მნიშვნელოვანი ცვლილებაა:

• ბიუჯეტის შემოსულობების ჯამური მაჩვენებელი იზრდება 1,17 მილიარდი ლარით და შეადგენს 17,93 მილიარდ ლარს;
• ბიუჯეტის ასიგნებები, ანუ ხარჯების მოცულობა იზრდება 1,11 მილიარდი ლარით და შეადგენს 19,5 მილიარდ ლარს;
• ბიუჯეტის დეფიციტი მცირდება 7,6% დან 6,9%-მდე;
• სამთავრობო ვალის მთლიან შიდა პროდუქტთან მიმართება მცირდება 54,6%-მდე;

სამინისტროები, რომელთა ბიუჯეტიც იზრდება

პროექტის თანახმად, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსთვის გამოყოფილი თანხა თავდაპირველ დამტკიცებულ ბიუჯეტთან შედარებით გაზრდილია 600 მილიონი ლარით და 6,09 მილიარდ ლარს აღწევს.

COVID-19-ის მართვასთან დაკავშირებით ბიუჯეტი იზრდება 446 მილიონი ლარით და შეადგენს 846 მილიონ ლარს, მათ შორის, COVID-19-ის საწინააღმდეგო ვაქცინაციის ფარგლებში არსებული გეგმის მიხედვით მოსახლეობის 60%-ის აცრისთვის საჭირო ვაქცინების შესყიდვის ხარჯებისათვის გათვალისწინებულია 150 მილიონ ლარზე მეტი.

ეკონომიკის და მდგრადი განვითარების სამინისტროს დაფინანასება იზრდება 36 მილიონი ლარით და 642,8 მილიონი ლარის ოდენობით განისაზღვრება.

რეგიონული განვითარებისა და ინფრასტრუქტურის სამინისტროს დაფინანსება 2021 წლის თავდაპირველ გეგმასთან შედარებით იზრდება 90 მილიონი ლარით და განისაზღვრება 2,46 მილიარდი ლარის ოდენობით.

გარემოს დაცვისა და სოფლის მეურნეობის სამინისტროს დაფინანასება იზრდება 177 მილიონი ლარით და 628,58 მილიონ ლარს აღწევს.

ბიუჯეტის კორექტირების შემდეგ თავდაცვის სამინისტრო დამატებით 30 მილიონ ლარს მიიღებს და მისი ჯამური დაფინანასება 930 მილიონი ლარი იქნება.

როგორც ცნობილია, საქართველოს განათლების, მეცნიერების, კულტურისა და სპორტის სამინისტრო უკვე ორ უწყებად გაიყო, თუმცა მისი დაფინანასების შესახებ ინფორმაცია ბიუჯეტში ერთად არის მოცემული. გადამუშავებული დოკუმენტის მიხედვით, უწყების დაფინანსება 75 მილიონით იზრდება და 1,87 მილიარდ ლარს შეადგენს.

დაფინანასება ეზრდება იუსტიციის სამინისტროსაც, რომელიც 60 მილიონი ლარით მეტს მიიღებს — მისი ჯამური ბიუჯეტი 296,5 მილიონი ლარი იქნება.

ცნობისთვის, საკანონმდებლო ორგანომ მიმდინარე წლის ბიუჯეტის გადამუშავებულ ვარიანტს 85 ხმით, ერთხმად დაუჭირა მხარი.