პარტია მოქალაქეების ერთ-ერთი ლიდერი, ალეკო ელისაშვილს სურს, საპარლამენტო მოსმენაზე შს მინისტრმა, ვახტანგ გომელაურმა თქვას, რომ ტოვებს თანამდებობას.

"მე ვისურვებდი, მოლოდინი არ მაქვს, მაგრამ, ვისურვებდი, რომ გამოვიდეს ბატონი გომელაური, თქვას, რომ მან თავი ვერ გაართვა თავის უფლებამოსილებას 5 ივლისს, ვერ დაიცვა ჩვეულებრივი მოქალაქეები წინასწარ დაანონსებული ძალადობისგან და თქვას, რომ მან დატოვა თანამდებობა. ეს იქნებოდა ძალიან სწორი, ძალიან ღირსეული, სახელმწიფოებრივი და პასუხისმგებლობით სავსე ქმედება", — განაცხადა ალეკო ელისაშვილმა.

აღსანიშნავია, რომ პრაიდის კვირეულის დაწყებამდე ელისაშვილი თავადაც ეწინააღმდეგებოდა ღირსების მარშის გამართვას და აცხადებდა, რომ ვერ ხვდება, რატომ მართავენ ამ პრაიდს. თუმცა, უშუალოდ 5 ივლისს, ღირსების მარშის ჩატარების მოწინააღმდეგე ჰომოფობიური ჯგუფების მიერ ჟურნალისტებზე თავდასხმების შემდეგ ელისაშვილმა შინაგან საქმეთა სამინისტრო გააკრიტიკა და მას უნიათო უწოდა.

დღეს, პარლამენტის პლენარულ სხდომაზე შინაგან საქმეთა მინისტრს, ვახტანგ გომელაურს მოუსმენენ.

გომელაურის პარლამენტში მიწვევის ინიციატივა ჯერ კიდევ 28 მაისს, დეპუტატმა ხათუნა სამნიძემ გამოთქვა. მას შს მინისტრის მიწვევა ადამიანის უფლებათა დაცვის კომიტეტზე სურდა, რათა კითხვები დაესვა პრაიდის კვირეულის ფარგლებში დაგეგმილი აქტივობების უსაფრთხოებასთან დაკავშირებით. მაშინ კომიტეტის თავმჯდომარემ, მიხეილ სარჯველაძემ განაცხადა, რომ სამნიძის განცხადება "არ იყო აკურატულად შედგენილი" და თავიდან გაგზავნა სთხოვა. ამის შემდეგ კი ამბობდა, რომ მინისტრს 5 ივლისამდე, ანუ დაგეგმილ ღირსების მარშამდე, პარლამენტში მისვლა, შესაძლოა, ვერ მოესწრო. 1-ელ ივლისს, პრაიდის კვირეულის დაწყების დღეს, სამნიძემ თბილისი პრაიდის ორგანიზატორებთან ერთად სპეციალური ბრიფინგი გამართა და გომელაურს კიდევ ერთხელ მოუწოდა, პარლამენტში პრაიდის უსაფრთხოებაზე სასაუბროდ მისულიყო.

არც პრაიდის კვირეულამდე და არც მის განმავლობაში გომელაური პარლამენტში არ მისულა. მის მიმართ კითხვები მას შემდეგ მომრავლდა, რაც 5 ივლისს დაგეგმილი ღირსების მარშის საწინააღმდეგო გამოსულმა ძალადობრივმა და ჰომოფობიურმა ჯგუფებმა მედიის 50-ზე მეტი წარმომადგენელს თავს დაესხნენ, შეიჭრნენ და დაარბიეს რამდენიმე სამოქალაქო მოძრაობის ოფისი. დღის წესრიგში დადგმა მისი გადადგომის მოთხოვნის საკითხიც.

გომელაური საჯაროდ მხოლოდ 8 ივლისს, ძალადობრივი კონტრაქციიდან მე-3 დღეს გამოჩნდა და თქვა პარლამენტში მივა, "ჯანმრთელობა თუ არ შეუშლის ხელს". გადადგომაზე დასმულ კითხვის პასუხად კი თქვა, რომ "ამაზე ბევრი ოცნებობს".

11 ივლისს გარდაიცვალა TV პირველის ოპერატორი, ლექსო ლაშქარავა. იგი ერთ-ერთია მედიის იმ ათობით წარმომადგენელს შორის, რომელსაც 5 ივლისს ძალადობრივი კონტრაქციის მონაწილეები ფიზიკურად გაუსწორდნენ. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. ლაშქარავას გარდაცვალების შემდეგ მედიის პროტესტი უფრო გააქტიურდა — ჟურნალისტები, ათასობით მოქალაქესთან ერთად, პარლამენტის წინ რამდენჯერმე შეიკრიბნენ და მოითხოვდნენ როგორც გომელაურის, ისე პრემიერმინისტრის, ირაკლი ღარიბაშვილის გადადგომას. 17 ივლისის აქციის დროს მათ მოუწოდეს საპარლამენტო ოპოზიციას, დაესწროს გომელაურის მოსმენას და დაუსვან კრიტიკული კითხვები.